Almatyda qandaı memqyzmetkerlerge artyq mindet júktelgen

ALMATY. QazAqparat - Almaty boıynsha QR Memlekettik qyzmet isteri jáne sybaılas jemqorlyqqa qarsy is-qımyl agenttigi óz mindetinen tys artyq jumys isteıtin memlekettik qyzmetkerler týraly aıtty, dep habarlaıdy QazAqparat tilshisi. 

«Memlekettik qyzmetkerlerdiń artyq istelgen jumys ýaqytynyń sebepterin zerttedik. Jyl basynda jappaı jumystan ketý jaǵdaıy bolǵanyn biletin shyǵarsyzdar. Óıtkeni adamdar jumys ýaqyty bitse de, úıge qaıtpaı eńbek etken. Onyń ústine, tólenetin jalaqy da máz emes. Artyq júktemeler qosymsha tapsyrmalardyń berilýimen baılanysty bolyp otyr»,-dedi  QR Memlekettik qyzmet isteri jáne sybaılas jemqorlyqqa qarsy is-qımyl agenttigi qalalyq departamenti basshysynyń orynbasary Shynaraı Álimhan. 

Onyń sózinshe, memlekettik organdarǵa laýazymdyq qyzmet nusqaýlyǵyna saı áreket etý usynylǵan. 

«Árbir memlekettik qyzmetkerdiń atqaratyn jumys ýaqytyn zerdeledik. 8 aýdandyq ákimdiktiń AHAJ uıymdarynda, sot mamandarynyń azdyǵyna baılanysty sot ákimshilikterinde jáne memkirister departamentinde artyq jumys isteý faktileri anyqtaldy»,-dep atap ótti Shynaraı Álimhan. 

Onyń aıtýynsha, memkirister departamentindegi júktemeler salyq esep-qısabyna baılanysty týyndap otyr. Ol qıyndyqtardyń ýaqytsha ekenin aıtyp, jaǵdaıdy júıeleýge ýáde berdi. 

«Sot ákimshiligi sotqa júktelgen jumystyń aýyrlyǵyn aıtyp, aryzdanady. Jalpy sot salasynda júkteme kóp. AHAT-taǵy jaǵdaı kadr jetispeýshgiligine kelip tireledi. Zertteı kele, bularǵa túsken salmaq memqyzmetker úshin belgilengen mejeden 12 ese artyq ekenin bildik»,-dedi ol.