Almatyda qanaty qataıǵan búrkitter tabıǵat aıasyna jiberiledi
ALMATY. QazAqparat - Almatydaǵy jyrtqysh qustardy baǵatyn «Suńqar» ortalyǵynda jasandy jolmen ósirilgen búrkit balapandary tabıǵat aıasyna jiberiledi, dep habarlaıdy QazAqparat tilshisi.
«Tabıǵatty saqtaýǵa úles qos» jobasy aıasynda jasandy jolmen baptalǵan jyrtqyshtar endi dala qyrandaryna qosylady.
«Jas búrkitterdi tabıǵat zańdylyǵyna beıimdeý kezeńinen keıin olardy tabıǵat aıasyna ushyramyz. Endi olar jabaıy tabıǵatta óz betimen tirshilik etedi. Biz olardy jemtik aýlaýǵa, erkin samǵaýǵa barynsha tárbıeledik», - deıdi «Suńqar» tálimbaǵynyń dırektory Ashot Anzorov.
Bul jobany Qazaqstandaǵy iri syra zaýyty tabıǵat ıgiligi úshin ári búrkitterdi qorǵaý maqsatynda qolǵa alǵan. Tálimbaq qurylǵan 5 jyldan beri baǵdarlama aıasynda 20 qyran uıadan ushqan.
«Biz bul jobany 2013 jyly bastadyq. Sol jyly ekologtar búrkitter popýlıatsııasynyń joıylý qaýpi bar degen baǵa bergen . Úlken jáne Kishi Bogýtta (Almaty oblysy) 6-7 jup qana qalǵan bolatyn. Baǵdarlamanyń arqasynda tabıǵattaǵy búrkit sany 3 esege artatynyna senimdimiz. Búrkit Qazaqstan Respýblıkasynyń ulttyq sımvoly retinde jobanyń mánin arttyra túsedi», - deıdi syra zaýytynyń korporatıvtik baılanys jónindegi dırektory Shyńǵys Qaskeev.
Joba uıymdastyrýshylary kóp uzamaı jas búrkitterdi tabıǵat aıasyna erkindikke jiberedi.
