Almatyda Qanat Islam men ózge boksshylarymyzdyń qatysýymen boks keshi bastaldy

Onda otandyq boksshymyz Qanat Islam sharshy alańda ganalyq Patrık Alloteımen kezdesip, WBA (Interim) tujyrymy boıynsha álem chempıony ataǵy úshin kúsh synasatyn bolady.

Birinshi orta salmaqta «WBA Fedelatin» ataǵyna ıe Qanat Islam osy ýaqytqa deıin 21 kezdesý ótkizip, barlyǵynda jeńiske jetken. Onyń 18-in nokaýtpen utqan.

 

Patrık Alloteı osyǵan deıin kásipqoı sharshy alańda 36 jekpe-jek ótkizgen. Onyń 34-inde qarsylastarynan basym túsken. Onyń 24-de qarsylastaryn nokaýtpen utsa, 2 jekpe-jeginde ǵana qarsylastaryna ese jibergen. Cońǵy ret 24 maýsym kúni sharshy alańǵa shyǵyp, otandasy Sanı Idanany jeńgen. Jekpe-jekteriniń barlyǵyn derlik Ganada ótkizgen. Úsh kezdesýi ǵana ózge elde ótken. Kásipqoı boksta «Ýly jebe» degen laqap atqa ıe.

Osy keshte sondaı-aq, óziniń kásibı bokstaǵy alǵashqy kezdesýin álem chempıony, Rıodaǵy Olımpıada oıyndarynyń qatysýshysy Jánibek Álimhanuly da ótkizedi. Munymen qatar, el namysyn Janqosh Turarov, Rýslan Myrsataev, Álı Ahmetov, Aıdar Sháribaev, Juman Jumabekov qorǵaıtyn bolatyn. 

Aıta keteıik, keshe, 28 qazan kúni Almatyda salmaq ólsheý rásimi ótip, qazaqstandyq boksshylarymyzdyń qarsylastary belgili boldy.

Atap aıtqanda, Jánibek Álimhanuly AQSh sportshysy Mılton Nýnezben qolǵap túıistiredi. 79 keli salmaqta olar 6 raýnd bokstasady.  
66 keli salmaq dárejesindegi Janqosh Turarov ganalyq Azek Arıımen 10 raýnd kúsh synasady.  

Salmaq ólsheý rásiminde 99 kelini kórsetken otandasymyz Rýslan Myrsataev ganalyq Nýhý Azýmımen (103 keli) qolǵap túıistiredi. Olarǵa 10 raýnd berilip otyr.

78 keli salmaq dárejesindegi Álı Ahmetov ázerbaıjandyq Álı Mammedovpen (77 keli) 6 raýndqa jekpe-jekke shyǵady. 

Salmaǵy 60 keli Aıdar Sháribaev ıspanııalyq Hýan Veneno Okýromen (59 keli) 6 raýnd boıy judyryqtassa, 63 keli salmaq dárejesinde óner kórsetetin Juman Jumabekov Belarýs boksshysy Vladımır Ivanovpen (63 keli) 4 raýnda kúsh synasady.

Buǵan deıin habarlaǵanymyzdaı, atalmysh keshke bıletter quny 1 myńnan 10 myń teńge aralyǵynda boldy.

Saǵat 18:00-de bastalǵan dodany «Qazaqstan» ulttyq arnasy tikeleı efırden kórsetýde.