Almatyda Qanat, Aıtkúl jáne Erbolat Qudaıbergen áýletiniń óner keshi ótti
ALMATY. Qarashanyń 18-i. QazAqparat /Erlik Erjanuly/ - Keshe Almatyda QR Eńbek sińirgen ártisteri Qanat, Aıtkúl jáne Erbolat Qudaıbergen áýletiniń "Týǵan tilim - tuǵyrym" dep atalatyn óner keshi ótti,
dep habarlaıdy QazAqparat.
"Ónerli áýlettiń bul keshi qarashanyń 11-i kúni Taldyqorǵan qalasynda ótken bolatyn. Búgin olar talǵampaz almatylyqtardyń da ystyq yqylasyna bólenip otyr. Endi ony aldaǵy ýaqytta Qyzylorda men Astana qalalarynda jalǵastyrmaqpyz. Qanat, Aıtkúl jáne Erbolat Qudaıbergen áýletiniń bul keshi - tyńdarmany negizinen eresekter, oǵan jastardyń qyzyǵýshylyǵy tómen, Respýblıka saraıynda tek estrada ánshileriniń kontsertinde ǵana zal kórermenge tolady degen túsinikti teriske shyǵaryp otyr", deıdi sharany uıymdastyrǵan "Altyn arqaý" mádenı-etnografııalyq birlestiginiń tóraıymy Ǵalııa Qaıdaýylqyzy.
Qanat, Aıtkúl Qudaıbergenovter óz repertýarlarynan "Alataý", "Ázil án", "Qyrǵyz qyzy", "Dos izdeımin", Jubaıym", "Aq kımeshek" sııaqty shyǵarmalardy oryndady. Al Erbolat Qudaıbergen " Úsh júzdi" aralap, "Jigitterdi" túgendep, "Men qazaqpyn" dep jahanǵa jar saldy. Saltanat pen Erkenaz "Jaqsy men jamandy" salmaqtap, "Meniń atym Ermek" dep ónerli otbasynyń eń jas ánshisi de óziniń úlken sahnadaǵy alǵashqy qadamyn jasady. Kesh kórigin qyzdyrýǵa kelgen Maqpal Júnisova men "Dý-dý" komedııa teatry da tyńdarmannyń qoshemetine bólendi.
