Almatyda qan aınalymy júıesi aýrýlarynyń aldyn alý máselesi qaralady
ALMATY. 28 qyrkúıek. QazAqparat - Almatyda 30 qyrkúıek kúni Salaýatty ómir saltyn qalyptastyrý ulttyq ortalyǵynda «Qan aınalymy júıesi aýrýynyń aldyn alý:
profılaktıkalyq baǵdarlamalardyń zamanaýı usynystary jáne keleshektegi damýy» degen taqyrypta dóńgelek ústel uıymdastyrylmaq. Ol Qazaqstan Respýblıkasynyń densaýlyq saqtaý salasyn damytýdyń 2011 - 2015 jyldarǵa arnalǵan «Salamatty Qazaqstan» memlekettik baǵdarlamasyn júzege asyrýdaǵy is-sharalarynyń jospary aıasynda Dúnıejúzilik júrek kúnine oraılastyrylǵan onkúndik boıynsha uıymdastyrylyp otyr. Basqosýǵa Kardıologııa jáne ishik aýrýlar ǵylymı-zertteý ınstıýtynyń, A. Syzǵanov atyndaǵy hırýrgııa ulttyq ortalyǵynyń, respýblıkalyq ǵylymı-tájirıbelik psıhıatrııa jáne narkologııa ortalyǵynyń basshylary jáne taǵy basqa da bilikti mamandar qatyspaq. Salaýatty ómir saltyn qalyptastyrý ulttyq ortalyǵynyń uıymdastyrý-ádistemelik bóliminiń jetekshiligimen ótip jatqan onkúndik 20 qyrkúıek kúni bastalǵan bolatyn. Statıstıka boıynsha qan aınalymy júıesi aýrýynan kóz jumatyndar az bolmaı otyr. Sol sebepten júrek aýrýyna erekshe nazar aýdarylýda jáne bul máselege tek medıtsına qyzmetkerleriniń ǵana emes, ǵalymdardyń, sonymen qatar Qazaqstan Respýblıkasynyń ár azamatynyń nazaryn aýdarý qajet. Máseleniń ózektiligine baılanysty Dúnıejúzilik júrek federatsııasynyń bastamasy jáne Dúnıejúzilik densaýlyq saqtaý (DDU) uıymynyń qoldaýy boıynsha jyl saıyn qyrkúıek aıynyń sońǵy jeksenbisinde dúnıejúzilik qaýymdastyq Búkilálemdik júrek kúnin atap ótedi. Bul kún bıyl «Saý júrekke jol tańda» uranymen ótkizilýde.
