Almatyda qamqorshy otbasylarǵa qurmet kórsetildi
ALMATY. Qazannyń 29-y. QazAqparat /Erbol Turymbetov/ - Búgin Almatydaǵy Oqýshylar saraıynda «Qamqorshy kúnine» arnalǵan merekelik shara ótti.
Respýblıkalyq «Balalarǵa jylylyq syıla» aktsııasynyń aıasynda Qazaqstan Respýblıkasy Bilim jáne ǵylym mınıstrligi sharany Balalardyń quqyqtaryn qorǵaý komıtetiniń bastamashylyǵymen «Qazaqstan qamqorshylarynyń odaǵy» QQ, «Shyǵarmashylyq bastamashy áıelder lıgasy» QB jáne «Balanyń úni» qoǵamdyq qorymen birlese uıymdastyrdy. Sharanyń basty maqsaty jetim balalardy qamqorlyǵyna alǵan abzal jandardy marapattaýǵa baǵyttalǵan.
Qazaqstanda 25 myńnan astam jetim jáne ata-ananyń qamqorlyǵynsyz qalǵan balalar qamqorshylyq januıalarynda tárbıelenýde. Salystyrmaly málimet boıynsha, balalar úılerindegi jetimder sany 15 myńnan astam, al patronattyq tárbıedegi bul kórsetkish 2 myńnan asady. Qamqorshylyq januıalary kóp jyldar boıy qajetti qoldaý tappaı, laıyqty nazarǵa ilinbedi.
«Qamqorshy kúni» meıramyn ótkizý qamqorshylyq januıalar men osy januıalarda tárbıelenýshi jetim balalar úshin el tarıhyndaǵy alǵashqy qaıyrymdylyq shara bolyp tabylady. Bastamany Astana, Almaty, Petropavl, Aqtóbe, Temirtaý qalalarynyń jurtshylyǵy qoldady jáne atalǵan qalalarda osy sharany bir kúnde ótkizýge birlesken sheshim qabyldandy», dedi Balalardyń quqyqtaryn qorǵaý departamentiniń dırektory Sulýshash Qýatjanova.
QR Parlament depýtattary, QR Bilim jáne ǵylym mınıstrliginiń bastamasymen jáne ÚEU qoldaýymen osy máselelerge qatysty túpkilikti áleýmettik mańyzy bar ózgeristerge qol jetkizildi. Sonyń negizinde, 2011 jyldyń 1-shi qańtarynan bastap óz januıalarynda jetim jáne ata-anasynyń qamqorlyǵynsyz qalǵan balalardy tárbıesine alǵan barlyq qamqorshylar men qorǵanshylarǵa balalardy asyraýǵa 10 AEK mólsherinde járdemaqy tólený josparlanýda.
Shara barysynda 250 qamqorshy otbasy men 470 jetim balaǵa syılyqtar tabystaldy. Keshtiń basty keıipkerlerine qurmet kórsetilip, balalar ujymdarynyń kontsertteri uıymdastyryldy. Sonymen birge, Ahmet Jubanov atyndaǵy mýzyka mektebiniń shákirtteri óner kórsetti.
