Almatyda kameralar kóliktiń ortasha júrip ótken jyldamdyǵyn anyqtaıdy
ALMATY. QazAqparat - Almaty kóshelerinde jańa beınebaqylaý júıesi iske qosylady. Endi kameralar kólikterdiń ortasha jyldamdyǵyn anyqtaıtyn bolady, dep habarlaıdy QazAqparat tilshisi.
Qalalyq Polıtsııa departamentiniń habarlaýynsha, «Jol qozǵalysy qaýipsizdigi» avtomattandyrylǵan vıdeobeketterge birqatar tehnıkalyq ózgertý engiziledi. Endi kameralar kóliktiń jaqyndap qalǵandaǵy ǵana emes, joldyń belgili bir bóligindegi júrip ótken ortasha jyldamdyǵyn da eseptep shyǵarady.
«Jyldamdyqty asyrýdyń saldarynan qalada jıi jol apaty bolyp turady. DSU málimetterine sáıkes, jyldamdyqty 1 kılometrge tómendetý apattardan bolatyn jaraqattardy 3% azaıtady. Qazirgi qolda bar beketterdiń múmkindigi shekteýli ekeni ras. Kameralar kólik jaqyndap qalǵandaǵy jyldamdyqty ǵana túsiredi. Júrgizýshilerdiń kópshiligi kameraǵa jaqyndap qalǵanda ǵana jyldamdyqty azaıtady», - dedi departamenttiń resmı ókili Saltanat Ázirbek.
Negizinen jyldamdyq V = S/T formýlasy arqyly esepteledi. S - eki vıdeopost arasyndaǵy qashyqtyq, T - sol qashyqtyqty júrip ótken ýaqyt.
Polıtsııa departamentiniń habarlaýynsha, bul úzdik tájirıbe qazir EýroOdaq elderinde, Japonııa, Ońtústik Koreıa, Qytaı, Reseı elderinde júzege asyp keledi.
Aıta ketý kerek, Almaty bıligi 2016 jyly sybaılas jemqorlyqtyń aldyn alý maqsatynda jol qozǵalysyn baqylaý úshin 1 myńnan astam kamera ornatqan bolatyn.
Olardyń ishindegi eń jetilgen túri «Sergek» kameralary bıyl tamyzda ornatyldy. Jyl sońyna deıin baǵdarlama testilik rejimde jumys jasap turady. 2019 jyldyń basynan bastap «Sergek» kameralary júrgizýshilerdiń barlyq quqyqbuzýshylyǵyn tirkeıtin bolady.
Qalalyq polıtsııa departamenti habarlaǵandaı, «Qaýipsiz qala» júıesindegi beınekameralardyń kómegimen ashylǵan qylmystardyń sany arta túsken.
