Almatyda kámeletke tolmaǵandarmen jumysty kúsheıtý boıynsha keńes ótti

ALMATY. QazAqparat - Almaty qalasy ákiminiń orynbasary Erjan Babaqumarov onlaın formatta qalalyq jáne aýdandyq bilim, qoǵamdyq densaýlyq basqarmalarynyń, sondaı-aq bilim berý jáne psıhologııa salasyndaǵy ÚEU ókilderiniń qatysýymen kámeletke tolmaǵandarmen jumys máseleleri boıynsha jedel áreket etý shtabynyń keńesin ótkizdi, dep habarlaıdy QazAqparat tilshisi.

Keńesti ashqan Erjan Babaqumarov kámeletke tolmaǵandarmen turaqty baılanys jasaýdyń jáne psıhologııalyq qoldaý kórsetýdiń, ásirese ózara is-qımyldyń ulttyq biryńǵaı testileý kezeńinde óte mańyzdy ekenin atap ótti.

Profılaktıkalyq jumys keshendi sıpatqa ıe jáne onyń quramyna oqýshylarǵa quqyqtyq tárbıe berý, quqyqtyq jappaı oqytý, ata-analarmen únemi aqparattyq-túsindirý jumystaryn júrgizý, sonymen qatar demalys kezinde nátıjeli jumysty qamtamasyz etý enedi.

«Bilim Foundation» qoǵamdyq qorynyń atqarýshy dırektory Janat Dosjanovanyń, Qazaqstan jáne Ortalyq Azııa otbasy ınstıtýtynyń atqarýshy dırektory Elmıra Alıevanyń aıtqan usynystary bilim berý uıymdaryndaǵy tárbıe jumysyn uıymdastyrýdyń ádisterin odan ári jetildirýge, psıhologııalyq densaýlyqty qorǵaý jáne damytýǵa baǵyttalǵan.

Talqylaý qorytyndysy boıynsha shtab tóraǵasy, Almaty qalasy ákiminiń orynbasary Erjan Babaqumarov qoǵamdyq densaýlyq jáne bilim basqarmalaryna mektep psıhologtarynyń jumysyna jańa ádisterdi engizý, onyń ishinde oqytýdyń onlaın formatyn eskere otyryp, usynystar ázirleýdi tapsyrdy.

Bul baǵytta psıhıkalyq densaýlyq ortalyǵynyń jumysy kúsheıtiledi. Sonymen qatar, bilim jáne sport basqarmalaryna jazǵy kezeńde aǵymdaǵy epıdemıologııalyq ahýaldy jáne sanıtarlyq qaýipsizdik standarttaryn saqtaı otyryp, balalar men jasóspirimderdiń demalysyn, ózderin shynyqtyrýlaryn jáne paıdaly ispen aınalysýyn uıymdastyrý jáne ótkizý tapsyryldy.

ıÝvenaldy saıasat máselelerine erekshe nazar aýdaryldy. Almatyda balalar men kámeletke tolmaǵandardyń quqyqtaryn qamtamasyz etý, balalardy qorǵaý erekshe baqylaýda.