Almatyda kámeletke tolmaǵan qyzdardyń jeńgetaılary tutqyndaldy
ASTANA. 3 tamyz. QazAqparat - Almaty polıtsııasy on alty jasar qyzdardy jezókshelikpen aınalysýǵa májbúrlegen úsh jeńgetaıǵa qarsy birneshe qylmystyq is qozǵady.
Bul aqparatty Almaty qalalyq ishki ister departamentiniń baspasóz qyzmeti taratyp otyr.
Vedomstvonyń atap ótýinshe, Anastasııa men Gúlnar esimdi jetim qyzdar ońtústik astanaǵa aqsha tabý maqsatymen kelip, jeńgetaılardyń qolyna túsip qalady. Qyzdar bir-birimen tanys bolmaǵanymen, óte uqsas jaǵdaıǵa tap bolǵan.
«Taraz qalasynyń azamatshasy Anastasııany jeńgetaılyqpen aınalysatyn eki áıel Seıfýllın dańǵylynda ornalasqan jaldamaly páterde alty aı boıy kúshtep ustaǵan. Klıentterdi tap sol jerge ákelip, qyzdyń beıtanys bireýlermen sóılesýine, dalaǵa shyǵýyna tyıym salǵan. Bir kúni sáti túsip, qursaýdan qashyp shyqqan jasóspirim jaqyn mańda ornalasqan tirek pýnktine júgirip jetip, ózine qatysty jasalǵan zańsyz áreketterge shaǵymdanady. Sol arada iske bizdiń bólimsheniń qyzmetkerleri aralasyp, bir saǵattan keıin eki kúdiktini de tutqyndady», - dedi Almaty qalalyq ІІD Uıymdasqan qylmyspen kúres basqarmasy adam saýdasymen kúres bóliminiń bastyǵy Tańat Nazanov.
Al Gúlnar Almatyǵa Atyraýdan kelgen. Ańqaý qyz jalaqysy jaqsy jumys taýyp berem degen Aısulý esimdi áıeldiń «adamgershiligine» senim artyp, arbaýdyń qurbanyna aınalady. Nátıjesinde Gúlnar eki aı boıy jezókshelikpen aınalysýǵa májbúr bolǵan. «Bul qyz da seksýaldyq quldyqtan sátti bosap shyqty, al ony májbúrlegen azamatsha qylmystyq jaýapkershilikke tartyldy. Qazirgi ýaqytta aldyn ala tergeý barysynda jábirlenýshilerdiń aty-jónin tekserip, olardyń Almatyǵa kelý sebepterin anyqtaıtyn bolamyz. Bizge belgilisi, Anastasııa - Tarazdaǵy balalar úıiniń tárbıelenýshisi, ol odan óz qalaýymen qashyp ketken. Al jeńgetaılyqpen aınalysqan úsh áıelge qarsy aıyp taǵyldy. Tergeý barysynda tutqyndalǵandarǵa qarsy adamdy zańsyz bas bostandyǵynan aıyrý, jeńgetaılyq syndy basqa da birqatar aıyptaýlar taǵylýy múmkin», - dedi T.Nazanov.
