Almatyda kámelet jasyna tolmaǵandar arasyndaǵy qylmys 25% tómendedi
ALMATY. QazAqparat - Almatyda kámeletke tolmaǵandar arasyndaǵy qylmys - 25,4%, qylmystardyń qaıtalanýy - 11,5%, otbasy-turmystyq qatynastar salasyndaǵy qylmystar 18,9% tómendedi. Bul týraly qalanyń bas polıtseıi halyq aldynda esep berý kezinde aıtty, dep habarlaıdy QazAqparat tilshisi.
«2021 jyldyń qorytyndysy boıynsha aldyńǵy jylmen salystyrǵanda qylmystardyń tirkelýiniń 4 paıyzǵa tómendeýine qol jetkizdik. Ózderińiz biletindeı, 2020 jyly pandemııa kezinde qatań lokdaýn barysynda qylmys 50% azaıǵan bolatyn. Osyǵan qaramastan, statıstıka barlyq salada qylmysty azaıtýdyń jaqsy úrdisi bar ekenin kórsetip otyr», – dedi Qanat Taımerdenov.
Almatynyń bas polıtseıi kámeletke tolmaǵandar arasyndaǵy qylmys - 25,4%, qylmystardyń qaıtalanýy - 11,5%, otbasy-turmystyq qatynastar salasyndaǵy qylmystar - 18,9% tómendegenin tilge tıek etti.
«Qylmystyń azaıýyna ótken jyly júrgizilgen birqatar is-sharalar áser etti. Bul polıtsııanyń modýldik beketterin ornatý jáne paıdalaný, jaıaý patrýlderdi kúsheıtý, sondaı-aq saıabaq aýmaǵynda elektrokarmen patrýldeý jumystaryn júrgizýdi qamtıdy. Biz ákimdik pen Іshki ister mınıstrliginiń qoldaýymen qala turǵyndary men qonaqtarynyń ózderin jaıly ári qaýipsiz sezinýi úshin búkil sharalardy qoldanyp jatyrmyz. Jalpy, ótken jyldyń qorytyndysy boıynsha alǵa qoıylǵan mindetterdiń barlyǵyn derlik oryndadyq», – dedi ol.
