Almatyda qalyń tuman túsip, kóktaıǵaq bolady

ALMATY. QazAqparat - Almaty qalalyq tótenshe jaǵdaılar departamenti «Qazgıdrometke» silteme jasap aýa raıyna qatysty eskertý jarııalady, dep habarlaıdy QazAqparat tilshisi.

17 qarasha kúni Almaty qalasynda qalyń tuman túsip, kóktaıǵaq bolady.

Qalalyq tótenshe jaǵdaılar departamenti qar men kóktaıǵaq kezinde jaıaý júrginshiler úshin de, kólikter úshin de jolda júrý qaýpi arta túsetinin eske saldy.

Osyǵan oraı, Almaty qalalyq TJD eskertedi:

- kóshelerden tek jol qozǵalysy erejesimen belgilengen oryndardan ǵana ótý kerek;

- joldan ótken kezde, basqa isterge (uıaly telefonmen sóılesý jáne t. b.) alańdamańyz;

- aldyńyzǵa, aıaqtyń astyna qarap júrińiz;

- aıaq kıimdi durys tańdaý kerek. Aıaq kıim budyrly órnegi bar, taıǵanamaıtyn materıaldan jasalǵan, tegis tabandy bolýy tıis;

- qolyńyzdy qaltańyzǵa salmańyz, bul muzda tepe-teńdikti saqtaýǵa múmkindik beredi;

- esińizde bolsyn, trotýarlar, kólik aıaldamalary, dúkenderge kireberistegi baspaldaqtar, tipti úıdiń kireberisinen de adamdar jıi qulap, jaraqattanýy múmkin.