Almatyda qalyń qar jaýdy, tazalaý jumystaryna 508 tehnıka tartyldy
ALMATY. QazAqparat– Almatyda táýlikten astam ýaqyt boıy úzilistermen qar jaýyp jatyr, dep habarlaıdy QazAqparat tilshisi.
Bir jarym kúnniń ishinde qalaǵa qalyńdyǵy 8-13 sm qar tústi, al taý etegindegi aýdandarda onyń qalyńdyǵy 18 santımetrge deıin jetti.
Kommýnaldyq qyzmetter qar jaýǵannan bastap jolǵa taıǵaqqa qarsy materıaldar sebýde.
«Kóktaıǵaqtyń aldyn alý maqsatynda túnde kóktaıǵaqqa qarsy materıaldar sebildi, qar jaýǵan kezde tógilgeni 4609 tonna. 417 arnaıy tehnıka jumyldyryldy, onyń ishinde 172 qumsepkish tehnıkasy bar. 627 jumysshy qar tazalady»,- delingen qalalyq kommýnaldyq qyzmettiń habarlamasynda.
Tańnan beri qalada 508 tehnıka men 1788 jol jumysshysy qar tazalaýda. Qalanyń joǵary ornalasqan aýdandarynda arnaıy tehnıkalar joldyń qozǵalys bóligindegi qardy syrtqa shyǵaryp jatyr.
Túnde trotýarlar, ortaq paıdalanatyn jerler, jaıaý júrginshi aımaqtary, ótpeli joldarǵa kiretin jáne shyǵatyn jerler qardan tolyqtaı tazartyldy.
Sınoptıkterdiń boljamy boıynsha, qar tústen keıin toqtaıdy.
