Almatyda qalyń qar túsip, aǵashtar qulap jatyr
ALMATY. QazAqparat – Qardyń qalyń túsýine baılanysty Almatynyń ár aýdanynda aǵashtar qulap jatyr, dep habarlaıdy QazAqparat tilshisi Almaty qalalyq TJD baspasóz qyzmetine silteme jasap.
Bir táýlikte aǵashtardyń qulaýynan segiz apat tirkelgen. «109» qyzmetiniń qutqarýshylary taldar qulaǵan mekenjaıǵa jedel baryp, olardy zalalsyzdandyryp jatyr.
«Medeý aýdanyndaǵy «Pýshkın kóshesi, 127» mekenjaıynda qulaǵan aǵash kópqabatty úıdiń kireberisin jaýyp qalǵan. Bostandyq aýdany «Kóktem-3» yqshamaýdanynda aǵash kólikti basyp qalǵan. Qutqarýshylar aǵashty kesip, KIA Carens avtokóligin aǵash qursaýynan bosatty. Sonymen qatar, Almaly aýdany Amangeldi kóshesinde de tal qulap, adamdardyń júrýine kedergi keltirgen. Qutqarýshylar avtokrannyń kómegimen aǵashtardy jerge túsirip, kesti», - delingen TJD habarlamasynda.
Sondaı-aq, habarlamada apatty jaǵdaıdyń aldy jedel alynǵany jáne eshkim zardap shekpegeni aıtylǵan.
Buǵan deıin, respýblıkalyq psıhıkalyq densaýlyq ǵylymı-praktıkalyq ortalyǵyna aǵash qulap, shatyry men qorshaýyn qıratqany týraly jazǵan bolatynbyz.
