Almatyda qalanyńyń tarıhy men Almaty qalasyn ár jyldary basqarǵan tulǵalar týraly derekti fılmniń tusaýy kesildi
ALMATY. Jeltoqsannyń 30-y. QazAqparat /Názıra Eleýhan/ - Búgin Almatyda «Táýelsizdik besigin terbetken» atty derekti fılminiń tusaýkeseri bolyp ótti,
dep habarlaıdy QazAqparat.
Derekti fılm memlekettik tapsyrys boıynsha, «Jańǵyrý» qoǵamdyq qory men Almaty qalasy ákimdigi Іshki saıasat basqarmasynyń qoldaýymen túsirilgen. Fılminiń uzaqtyǵy 25 mınýt.
Atalmysh derekti fılm Almaty qalasyna keshegi kezeńnen búginge deıingi eńbegi sińgen tulǵalarymyzǵa, búginde elimizdiń eń iri megapolısine aınalǵan shahardyń sham shyraǵyn jaqqan qaıratkelerdiń tulǵalyq turpattaryna arnalǵan. Derekti fılmde Kenesary hannan bastap, Almaty qalasynyń ornynda bolǵan Almaly hám Toıshybek bekinisin jaýdan qorǵaǵan Toıshybek, Baıseıit batyrlardan bergi ýaqyttaǵy Alash zııalylarynyń jáne Dinmuhammed Qonaev syndy tulǵalardyń, sonymen qatar, Almaty qalasyn ár jyldary basqaryp, iz qaldyrǵan azamattar týraly syr shertilgen.
Fılmniń tusaýkeserine sol tulǵalardy zerttep júrgen azamattarmen qatar, tulǵanyń tikeleı óz urpaqtary men kóz kórgender qatysyp, estelikter aıtyp, derekti fılm týraly óz oı-pikirlerin bildirdi.
«Almaty qalasyn basqarǵan, eńbegi sińgen qaıratkelerge arnalǵan derekti fılm baıaǵydan túsirilý kerek edi. Fılm áli de tolyqtyrylýy kerek. Negizinen nobaıy, bári durys, taǵylymdy derekti fılm dep sanaımyn. Osy oraıda aıta keteıin, bizdiń gazettiń tilshileri de Almaty qalasynyń tarıhyn zerttep, «Almatyny basqarǵandar» degen kitap shyǵardy, dedi «Almaty aqshamy» gazetiniń bas redaktory Qalı Sársenbaı. Onyń aıtýynsha Almatyny basqarǵan árbir adam - jeke bir tulǵa, jeke bir taǵdyr. Almatyny basqarǵan árbir tulǵanyń esimin el, halyq bilýi kerek.
