Almatyda qalanyń ortasyna mal jaıǵan adam jaýapkershilikke tartyldy
ALMATY. QazAqparat – Almaty polıtsııasy áleýmettik jelilerde júrgizilgen monıtorıng barysynda mal jaıý erejesin buzý deregin anyqtady, dep habarlaıdy QazAqparat tilshisi.
Turǵyndar Tóle bı dańǵyly men Shyǵys aınalma jolynyń qıylysyndaǵy kópirde jylqy jaıylyp júrgenin habarlaǵan.
«Bizdiń bólimsheniń ýchaskelik ınspektorlary mal ıesin anyqtady. 31 jastaǵy jigitke qatysty QR Ákimshilik quqyq buzý kodeksiniń 408-baby – mal jaıý erejesin buzý boıynsha ákimshilik hattama jasaldy», – deıdi Medeý aýdandyq polıtsııa basqarmasy bastyǵynyń orynbasary Farhat Sbanbaev.
Onyń aıtýynsha, zań jol apatynyń saldary jáne de basqa da tótenshe jaǵdaılardyń aldyn alý maqsatynda maldy túnde qorada ustaýǵa jáne úı janýarlarynyń jol boıynda jaıylýyna jol bermeýge mindetteıdi.
