Almatyda qalanyń ortalyǵyndaǵy ǵımaratta zańsyz kazıno jumys istegen
ALMATY. QazAqparat – Almatyda karantın kezinde jumys istegen zańsyz oıyn mekemesi anyqtaldy, dep habarlaıdy QazAqparat QR Ulttyq qaýipsizdik komıtetiniń baspasóz qyzmetine silteme jasap.
QR Ulttyq qaýipsizdik komıtetiniń Almaty qalasy boıynsha departamenti men Sybaılas jemqorlyqqa qarsy kúres agenttiginiń Almaty qalasy boıynsha departamenti QR Ulttyq ulanynyń «Búrkit» arnaıy maqsattaǵy bólimshesin tarta otyryp, naýryz aıynan bastap eldegi tótenshe jaǵdaı men Almaty qalasyndaǵy karantın rejımi ýaqytynda jumys istegen zańsyz oıyn mekemesi áreketiniń jolyn kesý boıynsha aýqymdy operatsııa ótkizdi.
«Osy jedel-izdestirý is-sharasy sáýirdiń 24-inen 25-ine qaraǵan túni ótkizildiú Vedomstvolardyń qyzmetkerleri qalanyń ortalyǵynda ornalasqan ákimshilik ǵımaratta 30-dan astam kelýshi men personal ustaldy. Qumar oıyny ótetin orynǵa kirý úshin arnaıy ótkizý júıesi áreket etken, ol boıynsha ishke tek turaqty kelýshi ǵana kire alatyn bolǵan. Aýmaǵy 1 000 sharshy metrden asatyn kazıno ishinde tintý barysynda poker men amerıkalyq rýletkaǵa arnalǵan 6 ústel, kóptegen oıyn kartasy men fıshkalar, sondaı-aq zańsyz áreketten túsken bir kúndik iri mólsherdegi aqsha tárkilengen», delingen habarlamada.
Zańsyz oıyn mekemesin uıymdastyrý faktisine qatysty QR QK 307-babynyń 2-bóligi boıynsha qylmystyq is qozǵaldy. «Jasyryn kazınoǵa» qatysqan adamdardyń barlyǵyna qatysty tótenshe jaǵdaı rejımin buzý faktisi boıynsha ákimshilik hattama toltyrylǵan.
