Almatyda qalanyń ekologııalyq jaǵdaıy talqylandy
ALMATY. 10 jeltoqsan. QazAqparat /Názıra Eleýhan/ - Búgin «Nur Otan» HDP Almaty qalalyq fılıalynyń ǵımaratynda Áleýmettik shıelenisterdi qarastyrý men sheshý jónindegi qoǵamdyq keńestiń kezekti otyrysy bolyp ótti.
Keńes aıasynda Almaty qalasynyń ekologııalyq jaǵdaıy qaraldy. Atap aıtqanda, avtokólikten shyǵatyn gazdardyń atmosferalyq aýany lastaýy, ókiletti organdardyń ruqsatynsyz jasyl jelekterdiń joıylýy jaıly máseleler kóterildi.
Qalalyq fılıal tóraǵasynyń birinshi orynbasary Amangeldi Karımýllınniń aıtýynsha, Almaty qalasynyń ekologııasy qazirgi ýaqytta qala turǵyndary kóterip otyrǵan eń ózekti máselelerdiń birine aınaldy. Osyǵan oraı Keńeske Almaty qalalyq tabıǵı resýrstar jáne tabıǵatty paıdalanýdy retteý basqarmasynyń bastyǵy Sultanbek Mákejanov arnaıy shaqyrylǵan.
S. Mákejanovtyń sózine qaraǵanda, ótken jyldan beri basqarmaǵa qaldyqtar men qalanyń sanıtarlyq jaǵdaıy, aryq júıesi jáne bul saladaǵy aýdandyq jumystaryn úılestirý jumystary qosylǵan.
Basqarma basshysy atap ótkendeı, mekemede birneshe baǵyttar boıynsha jumystar júrgiziledi. «Máselen, qala sýattary men ózenderdi tazalaý men jaqsartý jumystaryna arnalǵan baǵdarlama boıynsha 2011 jyly Almaty ózenderi men kól mańdaryna demalys oryndaryn jasaýdy josparlap otyrmyz. Al Saıran kólin jazda sýǵa túsetin, qysta muz aıdyny retinde qoldaný jaıyn qarastyryp jatyrmyz. Osy syndy demalys oryndary Qonaev atyndaǵy úlken Almaty sý arnasynda jáne taǵy basqa da ózen arnalarynda jasalatyn bolady», - dedi Sultanbek Mákejanov.
Ol jıynda aryq júıesine qatysty túıtkilder bar ekendigin aıtty. «Qaladaǵy kóp aryqtar jóndeýdi qajet etedi. Aldaǵy ýaqytta bul máseleni sheshe otyryp, aryq júıesin damytsaq, aǵashtar men gúlderdi kólikpen sýarýdan qutylatyn bolamyz. Ol sýdy únemdeýge yqpal etedi»,- dedi basqarma bastyǵy.
