Almatyda qalany tazartý jumysy kúsheıtildi

ALMATY. QazAqparat – Almaty qalasynyń aýmaǵyn tazartý boıynsha aýqymdy jumys júrgizilip jatyr. Qala kósheleri men trotýarlar jýylýda, dep habarlaıdy QazAqparat tilshisi.

Almaty ákimdigi taratqan málimetke sáıkes, kóshelerdi tazartý jumysyna 835 arnaıy tehnıka birligi, onyń ishinde 255 sýarý mashınasy, 57 trotýar tazalaǵysh, 159 traktor, sondaı-aq 1433 jol jumysshysy jumyldyryldy.

Qatty jaýyn-shashyn kezinde sýdyń kedergisiz aǵyp ketýin uıymdastyrý úshin aryqtar jáne joldyń qozǵalys bóliginiń astyndaǵy aryq ótkelderi tazartylyp jatyr.

Jalpy, 1161,7 shaqyrym tazartyldy. 27 myń tekshe metr qoqys pen laı syrtqa shyǵaryldy.

1 maýsymdaǵy jaǵdaı boıynsha 43,7 km bolatyn jol boıyndaǵy shópter oryldy. Oǵan124 shóp shabatyn jáne gazon oratyn tehnıka tartyldy.

Sanıtarlyq tazartý jónindegi «Birge taza Qazaqstan» respýblıkalyq aktsııa aıasynda 2021 jylǵy 5 maýsymda Almaty qalasynyń barlyq segiz aýdanynda kommýnaldyq merdigerlerdiń qatysýymen senbilik uıymdastyrylady, oǵan 80 tehnıka, 370 adam qatysady.

Koronavırýs ınfektsııasynyń taralýynyń aldyn alý úshin «Almaty tazalyq» MKK 8 sáýirden bastap 1933 qoǵamdyq kólik aıaldamalaryn, sondaı-aq jaıaý júrginshiler aımaqtary men trotýarlardy aptasyna 2 ret dezınfektsııalaýda.

Kún saıyn 500 myń sharshy metr trotýar men 50 myń sharshy metrden astam aıaldamany dezınfektsııalaý úshin shamamen 115 myń lıtr eritindi qoldanylady.

Aýdan ákimdikteri kestege saı aptasyna eki ret saıabaqtardy, skverlerdi, jerasty jáne ústi júrginshi ótkelderin jáne halyq kóp jınalatyn oryndardy dezınfektsııalaıdy.

Dezınfektsııa jumysyn kún saıyn 38 arnaıy tehnıka jáne 96 dezınfektsııalaýshy júrgizedi.