Almatyda qalamgerlerdiń úzdik shyǵarmalary anyqtaldy
ALMATY. QazAqparat - Almatyda jazýshylar arasyndaǵy «Altyn qalam - 2017» baıqaýy aıaqtalyp, úzdik shyǵarmalar anyqtaldy, dep habarlaıdy QazAqparat tilshisi.
Baıqaýǵa ár janr boıynsha bes shyǵarmadan engizildi. Bıyl uıymdastyrý komıtetiniń jáne qazylar alqasy quramynda Dosym Satpaev, Aıdos Sarym, Arman Shoraev, Rasýl Jumaly, Kenje Jumanuly, Qýat Dombaı, Áıgerim Raıymqulova, Beknýr Qısyqov, Tatıana Fılıpchık, Nurjan Muhamedjanova boldy. Baıqaýǵa qazaq jáne orys tilderinde jazylǵan 1076 jumys qabyldanǵan. Báıgege Qazaqstan ǵana emes, AQSh, Germanııa, Ýkraına, Reseı, Izraıl jáne Belarýs elinde turatyn avtorlar da qatysqan.
Bıyl alǵash ret taǵaıyndalǵan metsenat Esenqul Mamanov atyndaǵy syılyq Alashorda taqybyryn qamtyǵan úzdik týyndyǵa berildi. Bas júlde retinde taǵaıyndalǵan 1 mln teńgeni tarıhshy, jazýshy astanalyq Ámirjan Álpeıisov ıelendi. Al, balalar jazýshylaryna arnalǵan «Daraboz» baıqaýynyń bas júldesin jáne 1 mln teńgeni jazýshy qaraǵandylyq Tóken Áljantegi jeńip aldy.
«Bıylǵy júlde biz úshin erekshe boldy. Olaı deıtin sebebimiz, «Alash» partııasynyń qurylǵanyna 100 jyl tolýyna oraı, «Alashordaǵa 100 jyl» atalymy jarııalandy. Satıra janry bıyldan bastap jazýshy, satırık, aýdarmashy Esenjol Dombaı atyndaǵy «Jyldyń úzdik satırasy» bolyp ózgertildi. Sonymen qatar, buǵan deıin 11 ret ótkizilgen balalar jazýshylaryna arnalǵan Halyqaralyq «Daraboz» baıqaýy bıyl birinshi ret «Altyn qalam» ádebı júldesi aıasynda ótti. Bul balalar shyǵarmasyn qamtyǵan týyndylardyń sanyn ǵana emes, sapasynyń da artýyna septigin tıgizdi. Bizdiń akalam.kz saıty arqyly árbir shyǵarma óz oqyrmanyn tapty dep oılaımyz», - dedi «Altyn qalam» ádebı júldesi uıymdastyrý komıtetiniń dırektory Kenje Jumanuly.
«Altyn qalam 2017» ádebı júldesiniń jeńimpazdardy marapattaý sharasy Rixos Almaty qonaqúıinde ótti.
