Almatyda qalamger Sofy Smataevtyń mereıtoıyna arnalǵan shyǵarmashylyq kesh ótti

ALMATY. QazAqparat – Belgili jazýshy, dramatýrg, halyqaralyq «Alash» ádebı syılyǵynyń ıegeri Sofy Smataev – 80 jasta. Almatyda qalamgerdiń mereıtoıyna arnalǵan shyǵarmashylyq kesh ótti, dep habarlaıdy QazAqparat tilshisi.

Kesh «Men jeńemin!» teatrlandyrylǵan qoıylymymen ashyldy. Qoıylymǵa Sofy Smataevtyń ózi jáne M. Áýezov atyndaǵy Qazaq ulttyq akademııalyq drama teatrynyń ártisteri qatysty. Shyǵarmashylyq kesh osy teatr sahnasynda ótti.

Almaty ákimi Baqytjan Saǵyntaev Tuńǵysh Prezıdent – Elbasy N. Nazarbaev pen Memleket basshysy Qasym-Jomart Toqaevtyń Sofy Smataevqa arnalǵan quttyqtaý sózderin oqydy. Onda mereıtoı ıesiniń qazaq ádebıetin damytýǵa qosqan úlesi atap ótilgen.

Baqytjan Saǵyntaev óz quttyqtaýynda jazýshynyń qazaq ádebıeti klassıkteri men synshylarynyń shyǵarmalaryn zertteý salasyndaǵy eńbekterin de erekshe atap ótti. Sofy Smataev — jazýshylyq ónerge berilgen qalamgerlerdiń biri. Qala ákimi mereıtoı ıesi men onyń jaqyndaryna myqty densaýlyq, shyǵarmashylyq tabys jáne baq-bereke tiledi.

Shahardyń damýyna qosqan úlesi úshin Sofy Smataev Almaty qalasy ákimdiginiń «Eńbegi úshin» tósbelgisimen marapattaldy.

Qazaqstan Jazýshylar odaǵynyń tóraǵasy Ulyqbek Esdáýlet aıtqandaı, Almaty qalasy ákimdiginiń qoldaýymen sóz sheberleriniń 30 túrli kitaby jaryq kórdi, olardyń jalpy taralymy 65 myń dana. Onyń ishinde mereıtoı ıesi Sofy Smataevtyń 25 tomdyq shyǵarmalar jınaǵy jaryq kórdi. Kitaptar qala kitaphanalaryna qoıyldy.