Almatyda qalalyq senbilikke 240 myńnan astam adam qatysty (FOTO)
ALMATY. QazAqparat- Búgin Almatyda ótkizilgen jalpy qalalyq senbilikke 240 myńnan astam adam qatysty. Bul týraly búgin Almaty qalasy ákiminiń baspasóz qyzmetinen habarlady.
«Búgin Almatyda turǵyn úılerdiń aýlalary men kóshelerdi, aryqtar jelisi men ózenderdiń jaǵalaýyn, sý aıdyndaryn, saıabaqtar men qoǵamdyq oryndardy qoqystar men japyraqtan tazartý boıynsha jalpy qalalyq senbilik ótti», - delingen habarlamada.
«Adem» saýda ortalyǵynyń aldyndaǵy shaǵyn baqta bastaý alǵan sharaǵa qala ákimi Baýyrjan Baıbek, zııaly qaýym ókilderi, sportshylar, qoǵamdyq jáne jastar uıymdary men páter ıeleri kooperatıvteriniń ókilderi qatysty. Olardyń ishinde Qazaqstannyń halyq ártisi Tuńǵyshbaı ál-Tarazı, belgili alpınıst Maqsut Jumaev, QR eńbek sińirgen ártisi Maıra Іlııasova, qoǵamdyq qaıratker Arýjan Saıyn jáne basqa da belgili tulǵalar boldy.
Tazartý jáne aǵash otyrǵyzý sharalary Almaty qalasynyń barlyq aýdandarynda júrgizildi. Buǵan 240 myńnan astam adam qatysty. Almaty qalasynyń ákimdigi senbilikke qatysýshylardy qajetti qural-saımandarmen qamtamasyz etti. Bul sharaǵa qalanyń kommýnaldyq qyzmetteri tarapynan 600 arnaıy tehnıka jumyldyryldy. Jalpy qalalyq senbilikke qatysýshylardyń kúshimen barlyǵy 6 250 tekshemetr qoqys qala syrtyna shyǵaryldy.
«Qalanyń jasyl jelegin jańartý jumystary belsendi túrde júrgizilip keledi. Eger búgin jalpy qalalyq enbilik barysynda 6 myń aǵash kósheti otyrǵyzylatyn bolsa, bıylǵy jyldyń sońyna deıin taǵy 20 myń japyraqty jáne qylqan japyraqty aǵashtardyń kóshetteri otyrǵyzylady», - dedi Baýyrjan Baıbek.
Búgin buǵan qosa, osy kúzgi merzimde qoǵamdyq oryndar men turǵyn úılerdiń aýlalaryna jeke demeýshilerdiń kúshimen 100-den astam balalar jáne sport alańqaılary jasalatyn bolady. Bul jumys aldaǵy jyldyń kóktem aılarynan bastap qaıta jalǵasyn tabady. Jalpy, jospar boıynsha qalada taǵy osyndaı 350 alańqaı jasaý kózdelgen.
«Men búgin kásipkerlerimizge rızashylyǵymdy bildirdim. Olar Prezıdentimizdiń saıasatyn qoldaıdy. Bizdiń maqsatymyz - sportpen aınalysytan qala turǵyndarynyń sanyn kem degende 30 paıyzǵa jetkizý. Bul úshin kásipkerler óz qarjylaryna turǵyn úılerdiń aýlalaryn retke keltirip, ol jerlerge balalar jáne sport alańqaılaryn salyp jatyr. Bul qýanarlyq jaǵdaı», - dedi qala ákimi.
Sondaı-aq, senbilik barysynda qala basshysy «Eń úzdik páter ıeleri kooperatıvteri» baıqaýynyń jeńimpazdaryn marapattady. Birinshi orynǵa ıe bolǵan (Medeý aýdany) «Samal» kooperatıvine Baýyrjan Baıbek júk-jolaýshylar avtokóliginiń kilti men arnaıy dıplomdy tabystady. Áýezov aýdanynda ornalasqan «Qýanysh mekeni» kooperatıvi men Jetisý aýdanynda ornalasqan «Rozovaıa» kooperatıvteri sáıkesinshe ekinshi jáne úshinshi oryndarǵa ıe boldy. Olarǵa qar tazalaýǵa arnalǵan qol rotory men teledıdar tabys etildi.
Budan ózge, búgin qalada qorshaýlar men týrnıketterdi, oryndyqtardy, qoqys tastaıtyn jáshikterdi jáne jarnamalyq taqtalardy boıaý jumystary da júrgizildi.
Aıta ketelik, Almatyda ústimizdegi jyldyń 26 qyrkúıeginen bastap, endi kúz jáne kóktem mezgilderinde apta saıyn jalpy qalalyq senbilik ótkizilip turatyn bolady.
