Almatyda qalaǵa jańadan qosylǵan aýdandarda jol jóndelip jatyr
ALMATY. QazAqparat -Almaty ákimi Baqytjan Saǵyntaev Medeý men Túrksib aýdandaryna qosylǵan yqshamaýdandardaǵy ınjenerlik jáne jol-kólik ınfraqurylymyn damytý máseleleri jóninde kóshpeli keńes ótkizdi, dep habarlaıdy QazAqparat tilshisi.
Bul týraly ákim Instagram-paraqshasynda habarlady.
«Dýman» yqshamaýdanynda uzyndyǵy 27,4 shaqyrym bolatyn 53 kóshege asfalt tóseý úshin negiz daıyndalýda. Eń kúrdeli ýchaskelerge mán berip, jumysshy men tehnıkanyń sanyn kóbeıtýdi tapsyrdym», - dep jazdy Almaty ákimi.
2020 jyly «Dýman» yqshamaýdanynyń Han táńiri, Qazyǵurt, Qarqaraly, Aqmeshit, Býrabaı, Bolashaq kóshelerinde jalpy uzyndyǵy 3,1shaqyrym trotýar men aryq jelileri salyndy, jol tósemine kúrdeli jóndeý júrgizildi. Qoǵamdyq kóliktiń qaýipsiz qozǵalysyn qamtamasyz etý úshin termınaldyń burylý aımaqtary abattandyryldy.
«Nurshashqan» yqshamaýdanynda 7 kóshege iri asfaltbeton tóselip, 18 kóshede negiz daıyndalyp, 8 kóshege trotýar salyndy. Álmerektegi 9 kóshede, Qaırattaǵy 7 kóshede negiz daıyndaldy. «Ójet» yqshamaýdanynda da jumystar jalǵasýda. Eki kóshege iri asfaltbeton tóselip, 6 kóshede negiz daıyndaldy.
«Barlyq ýchaskelerde jumysty jandandyrý kerek. Zańbuzýshylyqtar oryn alsa, merdigerler jaýapkershilikke tartylady. Qala turǵyndary baıaý júrgizilgen jumys pen jaýapsyz jumysshylardan zardap shekpeýi tıis», - dep atap ótti qala ákimi.
Sondaı-aq, talshyqty-optıkalyq jeli boıynsha joǵary jyldamdyqty ınternettiń qoljetimdiligi máselesi sheshilýde. Joba pılottyq rejımde Túrksibtegi «Nurshashqan» yqshamaýdany men Naýryzbaı aýdanyna qarasty «Tastybulaq» yqshamaýdanynda qosyldy. Qosylýǵa 8 myńnan astam ótinim jınaldy. Qyzmet aqysyn bólip tóleýge bolady. Áleýmettik jaǵynyn az qamtylǵan azamattarǵa jeńildetilgen paketter de bar.
