Almatyda «Qalaǵa taza aýa» aılyq aktsııasy bastaldy
ALMATY. 13 qańtar. QazAqparat /Erbol Turymbetov/ - Búgin Almaty qalasy tabıǵı resýrstar jáne qorshaǵan ortany qorǵaý basqarmasy «Qalamyzǵa taza aýa» aılyǵynyń aıasynda baspasóz týryn uıymdastyrdy.
Týr barysynda BAQ ókilderi Almatydan 13 shaqyrym jerde jol polıtsııasy qyzmetkerleriniń qaladaǵy avtokólikterdiń aýany lastaý deńgeıin anyqtaıtyn avtotest júrgizýine kýá boldy. Sonymen birge, ekinshi qalalyq jylý elektr stansysy mańynda aýanyń lastaný deńgeıin anyqtaýmen aınalysatyn qalalyq qutqarý qyzmetiniń arnaıy jyljymaly hımııalyq-radıoaktıvtik zerthanasy qyzmetiniń júrgizilý barysymen tanysty. Úshinshi kezekte BAQ ókilderi reseılik «Gazpromneft» kompanııasynyń enshiles «Gazpromneft - Qazaqstan» kompanııasynyń kólik janarmaı beketteriniń birinde janarmaı sapasyn anyqtaý sátin baqylady.
Qalalyq tabıǵı resýrstar jáne qorshaǵan ortany qorǵaý basqarmasy bastyǵynyń orynbasary Murat Batyrbaevtyń aıtýyna qaraǵanda, ótken jyldarmen salystyrǵanda, Almaty aýasynyń lastaný deńgeıi birshama kemigen.
