Almatyda qaladan shyǵatyn joldarǵa «Sergek» kameralary ornatylady

ALMATY. QazAqparat - Almaty qalalyq polıtsııa departamentiniń Ákimshilik polıtsııa basqarmasy qaladan negizgi shyǵý joldaryndaǵy kólik qozǵalysy jaǵdaıynyń shıelenisýine baılanysty alańdaýshylyq bildirdi, dep habarlaıdy QazAqparat tilshisi.

«Keıbir azamattar taksı qyzmetin kórsetetin ótip bara jatqan kólikterdi toqtatý maqsatynda jol boıynda qol sozyp, óz áreketterimen jol bóligin jasandy taryltyp, kólik keptelisi men tótenshe jaǵdaılardyń týyndaýyna ákep soqtyrady. Sol arqyly óziniń ǵana emes, basqa da jol qozǵalysyna qatysýshylardyń ómiri men densaýlyǵyna qaýip tóndiredi. Joǵaryda aıtylǵandardy negizge ala otyryp, biz «Sergek» kameralaryn qaladan shyǵatyn negizgi joldarǵa: Tóle bı dańǵyly – Momyshuly kóshesi, Raıymbek dańǵyly – Momyshuly kóshesi, Raıymbek dańǵyly – Áshimov kóshesi qıylystaryna eksperımentaldy túrde ornatýdy usyndyq», – dedi Almaty qalalyq polıtsııa departamenti Ákimshilik polıtsııa basqarmasynyń bastyǵy Nurlan Amanbek.

Sonymen qatar, Almaty qalasynyń polıtseıleri jol qozǵalysyna qatysýshylardyń barlyǵyna (júrgizýshilerge de, jaıaý júrginshilerge de) QR Jol qozǵalysy erejeleriniń talaptaryn múltiksiz saqtaý qajettigi týraly úndeýde.