Almatyda qala joldaryndaǵy kóktaıǵaqty boldyrmaý úshin 300 tonna qospa sebildi
ALMATY. QazAqparat - Almatyda aýa temperatýrasynyń 0,- 2º tómendeýine baılanysty, qalanyń ortalyq jáne soltústik bóligine, sonymen qatar, taýly jáne taý shatqalyndaǵy aýdandarynda túngi 26 qazan kúni 1-den bastap, kóshelerde taıǵaqqa qarsy materıaldar sebildi, dep habarlaıdy QazAqparat Almaty qalasy tabıǵı resýrstar jáne tabıǵatty paıdalanýdy retteý basqarmasyna silteme jasap.
Basqarmanyń habarlaýynsha, qar tazalaýǵa jáne muz qatýyn boldyrmaýǵa 127 tehnıka men 300 tonna kóktaıǵaqqa qarsy qospa paıdalanylǵan. Basqarmadaǵylardyń aıtýynsha, Almatyda jol betin retke keltirýge byltyrǵy qystan beri ınnovatsııalyq tehnologııa qoldanylyp keledi.
Buǵan deıin atalǵan vedomstvo qysqa daıyn ekenin jetkizgen. Qysta qar tazalaý jumystarymen 15 merdiger mekemeler men «Almaty tazalyq» memlekettik kommýnaldyq mekemesi aınalysady. Qalanyń 7 aýdanynyń 60 paıyzyn tazalaý atalǵan memlekettik kommýnaldyq mekemeniń enshisinde. Onda barlyǵy 967 arnaıy tehnıka bar. Jol jumystaryna barlyǵy 1600 adam tartylǵan.
