Almatyda qala turǵyndarynyń ótinishi boıynsha jańa avtobýs baǵyty iske qosyldy
ALMATY. QazAqparat – Búginen bastap Almaty qalasynda jańa marshrýt iske qosyldy, dep habarlaıdy QazAqparat tilshisi.
Almaty qalalyq mobıldilik basqarmasynyń málimetinshe, Alataý aýdany turǵyndarynyń qala ákimimen kezdesýinde aıtylǵan ótinishteri boıynsha 1 qyrkúıekten bastap №142 jańa baǵyt iske qosyldy.
Jańa № 142 qoǵamdyq kóligi «Energostroıtel» baý-baqsha seriktestiginen F.Ońǵarsynova kóshesi boıymen Rysqulov dańǵyly - Momyshuly kóshesi - Abaı dańǵyly - Saın kóshesi - Shalıapın kóshesi - Momyshuly kóshesi boıymen júretin bolady.
Keri baǵytta Momyshuly kóshesimen Rysqulov dańǵylyna deıin - Ońǵarsynova kóshesimen «Energostroıtel» baý-baqsha seriktestigine deıin qatynaıdy.
Buǵan deıin megapolıste № 109 qoǵamdyq kólik iske qosylǵan bolatyn. Ol «Terekti» yqshamaýdany men № 6 shaǵynaýdany baǵytynda qatynaıdy.
