Almatyda qala turǵyndaryn jer silkinisine daıyndaý boıynsha baǵdarlama qolǵa alyndy
Bul týraly búgin Almatyda ótken arnaıy baspasóz máslıhatynda jobanyń uıymdastyrýshylary - Qazaqstannyń Ulttyq Qyzyl Aı Qoǵamy (QR QAQ) men «Shevron» kompanııasynyń ókilderi málim etti.
«Baǵdarlama Amerıkalyq Qyzyl Krestiń tehnıkalyq qoldaý kórsetýimen júzege asyrylyp jatqan «Alańdaýsyz Ortalyq Azııa» aımaqtyq jobasynyń bir bóligi bolyp tabylady. Jobanyń basty maqsaty - Almaty qalasynyń turǵyndaryna jer silkinisine daıyn bolýdyń negizgi qaǵıdalaryn, ıaǵnı apat kezinde, oǵan deıin jáne odan keıin ne isteý kerektigin úıretý bolyp tabylady», - deıdi jobanyń uıymdastyrýshylary.
Qazaqstandaǵy Qyzyl Aı qoǵamy jyl boıy mektep oqýshylaryna, JOO stýdentterine, qaladaǵy uıymdardyń qyzmetkerlerine jáne bıznes-qurylymdardyń ókilderine trenıngter ótkizbek. Qyzyl Aı qoǵamynyń aǵymdaǵy jylǵy josparynda 20 000 adamdy zilzalaǵa qarsy turýǵa daıyndaý jáne alǵashqy kómek kórsetý daǵdylaryna úıretý maqsaty tur. Trenıngter baǵdarlamasynda tótenshe jaǵdaılar kezindegi jeke bastyń jáne otbasynyń jospary, «dabyl shabadanyn» daıyndaý, dúmpýler kezindegi qaýipsiz júris-turys erejeleri, alǵashqy kómek kórsetýdiń negizgi qaǵıdalary qarastyrylǵan.
«Tótenshe jaǵdaılarǵa daıyndaý jáne jaýap berý sharalaryna úkimet pen resmı halyqaralyq agenttikterdiń daıyndyqty arttyrý boıynsha is-qımyldary ǵana emes, sondaı-aq, jergilikti, ulttyq jáne halyqaralyq deńgeıde azamattyq qoǵamdy da tartýy tıis», - dep esepteıdi QR Qazaqstandaǵy Qyzyl Aı qoǵamynyń prezıdenti Erkebek Arǵymbaev. Onyń aıtýynsha, bul joba dál osyndaı áriptestiktiń jarqyn mysaly bolyp tabylady.
Atalmysh jobanyń mańyzdy quramdas bólikteriniń biri eriktiler bolyp tabylady. Qyzyl Aı Qoǵamy eriktileri arnaıy oqytýdan ótip, jer silkinisine daıyndaý jáne alǵashqy kómek kórsetý boıynsha emtıhan tapsyrǵan soń, keń aýqymdy trenıngter ótkizetin bolady. QR Qyzyl Aı qoǵamy barlyq yqylas bildirýshi tulǵalardy erikti nusqaýshy retinde osy jobaǵa qosylýǵa shaqyrady.
«Shevron» kompanııasy elimizdiń ekonomıkalyq ósimi, halyqty oqytý jáne tulǵa áleýetin damytýǵa járdemdesetin bastamalar men baǵdarlamalardy damytýǵa erekshe nazar aýdaryp keledi. Sonymen qatar, óndiris aýmaǵynda jáne turmys jaǵdaıyndaǵy qaýipsizdikti qamtamasyz etý máselesi de bizdiń basty nazarymyzda. Sondyqtan turǵyndardy tótenshe jaǵdaılarǵa daıyndaý, jer silkinisi kezinde halyqty júris-turys daǵdylaryna úıretý sekildi mańyzdy máseleden biz tysqary qala almaımyz», - deıdi «Shevron» kompanııasynyń qoǵammen baılanys jónindegi departament dırektory Erkin Zikibaev.
