Almatyda qala turǵyndary men qonaqtary Tóleýbek Aralbaıdyń «Teatr álemine saıahat» jasady
ALMATY. Mamyrdyń 24-i. QazAqparat /Erlik Erjanuly/ - Keshe Almatyda Qazaqstannyń eńbek sińirgen ártisi, teatr jáne kıno akteri, rejısser Tóleýbek Aralbaıdyń 60 jyldyq mereıtoıyna arnalǵan «Teatr álemine saıahat» dep atalatyn benefısi ótti,
dep habarlaıdy QazAqparat.
Bul shara áıgili sahna sheberi 35 jyl boıy qyzmet jasap kele jatqan Qazaqtyń Muhtar Áýezov atyndaǵy memlekettik akademııalyq drama teatrynda boldy. Atasynyń benefısin nemeresi Aqbaıan Qumarova júrgizdi. Onda óner súıer qaýym akterdiń teatrdaǵy keıipkerlerimen júzdesti. Ol Iran-Ǵaıyptyń «Men ishpegen ý bar ma» dramasyndaǵy Abaı (rejısseri Asanáli Áshimov) men Ý. Gadjıbekovtiń «Arshyn-mal alanyndaǵy» Sultanbekpen (rejısseri Tuńǵyshbaı Ál-Tarazı) bastalyp , Sh. Aıtmatovtyń «Ǵasyrdan uzaq kúnindegi» Edigege (rejısseri Asanáli Áshimov) ulasty. Ony oryndaýǵa teatrdaǵy áriptesteri men shákirtteri kómektesti. Óner sańlaǵy Edige róli úshin 1985 jyly Ortalyq Azııa teatrlarynyń Táshkentte ótken І Halyqaralyq teatr festıvalinde «Er adam rólin úzdik oryndaǵany úshin» júldesin jeńip alǵan bolatyn. Sahnada tragedııalyq, komedııalyq, dramalyq san túrli keıipkerdi somdaǵan T.Aralbaı kıno óneri men rejıssýra salasynda da ónimdi eńbek jasady. Onyń dáleli «Ajdaha jyly», «Shoqan Ýálıhanov», «Azıat», «Qyz jylaǵan», «Mustafa Shoqaı», «Reketır» kórkem fılmderi jáne «Toǵysqan taǵdyrlar», «Sarancha» teleserıaldarynda keıipkerleri. Sondaı-aq teatr sahnasynda tabysty júrip jatqan «Syǵan serenadasy» (I.Saparbaı) mıýzıkli, «Qara kempir»(Á.Ámzeev), «Úmit úzgim kelmeıdi» (N.Kelimbetov) dramalary.
