Almatyda qala ortalyǵyndaǵy konkıdi jalǵa beretin orynjaı órtendi
ALMATY. QazAqparat – Almatyda túnde konkılerdi jalǵa alýǵa arnalǵan oryn otqa orandy. Bul oqıǵa týraly qalalyq Sport basqarmasynyń basshysy Rústem Baıseıitov Instagram jelisinde jazdy, dep habarlaıdy QazAqparat tilshisi.
Onyń aıtýynsha, Medeý aýdanynyń 28 gvardııashy-panfılovshylar saıabaǵynda ornalasqan qalanyń tegin muz aıdynynda konkılerdi jalǵa alýǵa arnalǵan orynjaı órtengen.
«Órt týraly habar Almaty qalasynyń TJD kezekshisiniń pýltine 00:32 tústi. Órt sóndirýshiler oqıǵa ornyna 4 mınýttyń ishinde jetti. 6 mınýt ishinde órt aýyzdyqtalyp jáne taǵy 4 mınýttyń ishinde tolyǵymen sóndirilgen. Gıdranttardyń jaramdy bolǵany órttiń tez aýyzdyqtalýyna yqpal etti. Qazir TJD jyljymaly zerthanasy saraptama jasap jatyr», - deıdi TJD baspasóz qyzmeti.
Tilsiz jaý 70 sharshy metr aýmaqty sharpyǵan.
Qalalyq Sport basqarmasynyń basshysy Rústem Baıseıitovtiń aıtýynsha, tótenshe jaǵdaıǵa qaramastan tegin syrǵanaý qyzmeti óz jumysyn qalypty rejimde jalǵastyratyn bolady.
