Almatyda qala mańyna júretin jańa 10 qoǵamdyq kólik iske qosylady
ALMATY. QazAqparat – Almaty ákimdigi kólik qoljetimdiligin jaqsartý jáne qala mańyndaǵy aımaqtyń turǵyndaryn qoǵamdyq kólikpen qamtamasyz etý úshin qala mańyna qatynaıtyn 10 jańa marshrýtty iske qosýdy josparlap otyr, dep habarlaıdy QazAqparat tilshisi.
Almaty ákimdiginiń málimetinshe, jańa marshrýttar qala sheginen 50 shaqyrym radıýsta ornalasqan Almaty oblysynyń Talǵar, Іle, Qarasaı jáne Jambyl aýdandaryndaǵy birqatar eldi mekendi qamtıtyn bolady.
«Jetisý bazary – Dáýlet kenti, «Almaty 1» temirjol vokzaly - Týǵanbaı kenti, Nura, «Almaty 2» temirjol vokzaly – Tuzdybastaý kentindegi «Sultan» kesheni, «Raıymbek batyr» metro beketi – Elaman kenti, «Saıahat» avtovokzaly – Qaraoı kenti, «Sálem» bazary soltústik aınalma – Isaev kenti, «Adem» saýda úıi – Batyr kenti baǵyttary boıynsha júredi. Sonymen birge, Tóle bı-ıAssaýı kósheleriniń qıylysyndaǵy burylystan Qarǵaly, Shamalǵan jáne Myńbaev eldi mekenderi baǵytynda birneshe marshrýt uıymdastyrylady», - delingen ákimdiktiń habarlamasynda. Sonymen qatar bıyl №9 jańa qalalyq marshrýt iske qosylyp, №97 jáne №89 eki jańa marshrýttyń ashylýy josparlanǵan. Jańa marshrýttar áleýmettik mańyzy bar qatynastarǵa jáne halyq úshin qoǵamdyq kólikte jol júrýdiń qoljetimdiligin qamtamasyz etý maqsatynda sýbsıdııalaýǵa jatady.
Aıta keteıik, «Almaty qalasyn damytýdyń 2025 jylǵa deıingi baǵdarlamasy men 2030 jylǵa deıingi ortamerzimdi perspektıvaǵa» sáıkes, 2024 jyldyń sońyna deıin Almaty qalasynyń ákimdigi qala mańyndaǵy 30 jańa marshrýtty uıymdastyrýdy josparlap otyr.
«Qazir qalalyq mobıldilik basqarmasy marshrýttardy bekitý jáne olardy áleýmettik mańyzy bar marshrýttar tizilimine engizý týraly qaýly jobasyn ázirledi. Qujatpen www.legalacts.kz ashyq normatıvtik-quqyqtyq aktiler portalynda tanysýǵa bolady. Tasymaldaýshyny jáne osy baǵyttardy iske qosý merzimin aıqyndaýǵa arnalǵan baıqaý qala máslıhaty qujatty bekitken soń ótkiziledi», - dep habarlady Almaty ákimdiginiń baspasóz qyzmeti.
