Almatyda qala qurylysy keńesi birqatar jobalardy bekitti

Qalalyq ákimdiktiń baspasóz qyzmetiniń habarlaýynsha, keńeste kóppáterli úsh turǵyn úı men Qazaq-Brıtan Tehnıkalyq ýnıversıtetiniń PE&IT ınstıtýtynyń kópfýnktsıonaldy keshenin salý jobalary qaraldy.

Úsh turǵyn úı keshenin salý úshin 19 mlrd. teńge ınvestıtsııa tartylmaq. Jobalar 3000-ǵa jýyq jumys ornyn ashýǵa, 120 oryndy eki bala baqsha turǵyzýǵa múmkindik beredi.

Atap aıtqanda, Bostandyq aýdanyndaǵy Radostovets kóshesiniń batysynan Qojabekov kóshesiniń soltústigine qaraı biryńǵaı arhıtektýralyq ansambldi quraıtyn 14 qabatty eki nysannyń qurylysy bastalady. Turǵyn keshenin jobalaý barysynda abattandyrý, demalys aımaǵyn jasyldandyrý, balalar alańdaryn jasaý, kishi pishindi arhıtektýraly formalardy qoıý qarastyrylǵan. Turǵyn úı 16 aıda salynyp bitedi.

Sonymen qatar, Túrksib aýdanynyń «Qaırat» eldi mekeninde saýda ortalyǵy bar turǵyn úı kesheni paıda bolady. Jospar boıynsha on bir 9 qabatty turǵyn úı, saýda ortalyǵy, 200 oryndy parkıng pen mektep jasyna deıingi balalar mekemesin salý kózdelgen. Jobany júzege asyrý merzimi - 36 aı.

Keshenniń turǵyn úıleri Rysqulov kóshesine perpendıkýlıar ornalasady. Investor joba aıasynda Úlken Almaty kanaly arqyly ótetin kópirdi tegin salyp berýdi josparlap otyr. Bul turǵyndar men qalanyń shuǵyl qyzmetteri úshin óte qolaıly bolmaq.

Bulardan ózge, Almaly aýdanyndaǵy Naýryzbaı batyr kóshesi boıynda 3 sektsııadan turatyn árqaısysy 12 qabatty turǵyn úı kesheni boı kóteredi. Keshende kommertsııalyq negizdegi nysandar, jeke jer asty parkıngter bolady.

Jıyn barysynda jáne bir uzaqmerzimdi joba - Qazaq-Brıtan tehnıkalyq ýnıversıtetiniń PE&IT ıntsıtýtynyń «Alataý» yqsham aýdanynda boı kóteretin qosalqy nysandary bar kópfýnktsıonaldy kesheniniń qurylysy  qaraldy.

Keshenniń ǵımaraty «PIT» arnaıy ekonomıkalyq aımaǵynyń 30 ga jerine ornalasady.

Birinshi bóliginde oqý-jattyǵý polıgony, al ekinshisinde keshenniń ǵylymı- óndiristik aýmaǵy men oqý-ákimshilik korpýstyń, mýltmedııalyq ortalyqtyń, ashananyń, stýdenttik ortalyqtyń, ǵylymı- zertteý laboratorııasynyń jáne basqalarynyń basyn biriktiretin kópfýnktsıonaldy nysan boı kóteredi.

Jobanyń quny - 118,9 mlrd. teńge. Qurylys 2,5 jylda aıaqtalmaq.

Keńes barysynda mamandar bala baqsha men mektep qurylysyna aıryqsha nazar aýdarylady. Sońǵy 2 jyl ishinde ınvestorlar esebinen 7 myń oryndy 54 bala baqsha salý jóninde sheshim qabyldanǵan. 3 myń oryndy 24 bala baqsha kommýnaldyq menshikke beriledi. Osynyń arqasynda bıýdjettiń 24 mlrd. teńgesi únemdeldi.