Almatyda qala ekologııasyn jaqsartýǵa arnalǵan jańa joba iske asyrylady
ALMATY. Qańtardyń 26-sy. QazAqparat / Ádilet Musaqaev / - Búgin Almatyda qala ekologııasyn qorǵaýǵa baǵyttalǵan jańa joba tusaýyn kesti,
dep habarlaıdy QazAqparat.
«Almaty qalasyndaǵy mektepter men qoǵamdastyqtardyń qorshaǵan ortany qorǵaý máseleleri jónindegi qoǵamdyq málimetterin damytý» atty jobany Qazaqstandyq Qyzyl Jarty Aı qoǵamy júzege asyrmaq. Ony qarjylandyrýǵa Eýropalyq Keńes 152 000 eýro bólse, nıderlandylyq Qyzyl Krest qoǵamy 24 000 eýro bólip otyr.
QR Qyzyl Jarty Aı qoǵamynyń vıtse-prezıdenti Vadım Qadyrbaevtyń aıtýynsha, bul jobanyń mańyzy óte zor. «Qazirgi kezde Almaty qalasy dúnıejúzi boıynsha aýasy las qalalardyń aldyńǵy shebinde. Atalmysh jobanyń tek ekologııalyq qana emes, tárbıelik te máni bar. Jobany iske asyrýǵa qalamyzdyń 15 mektebiniń oqýshylary qatysady», deıdi V.Qadyrbaev.
Joba sheńberinde arnaıy bilim beretin mektep oqýshylary men olardyń ata-analary, muǵalimderine jáne barlyq qala turǵyndary arasynda aýanyń lastanýynyń yqpaly týraly, densaýlyqqa tıgizetin zardaptary jaıynda semınarlar ótkiziledi. Sonymen qatar Almatynyń aýdandaryn tazartyp, aǵashtar otyrǵyzyp «jasyl aımaqqa» aınaldyrý jumystary júrgizilmek.
Semınarǵa joba boıynsha áriptes qalalyq ákimshilik, Salaýatty ómir saltyn saqtaý máseleleri jónindegi ulttyq jáne qalalyq ortalyq, Kólik jáne kommýnıkatsııa ǵylymı-zertteý ınstıtýty ókilderi men ekologııalyq úkimettik emes uıymdar men sarapshylar qatysty.
Joba bastapqy kezeńde tek Almatyǵa júrgizýge eseptelingen, degenimen onyń tıimdiliginine baılanysty elimizdiń basqa da qalalarynda júzege asyrý múmkinshiligi qaralmaq.
