Almatyda qala aýasynyń lastaný deńgeıi tómendedi
ALMATY. 6 jeltoqsan. QazAqparat /Názıra Eleýhan/ - Almatyda atmosferanyń lastaný ındeksiniń deńgeıi (IZA 5) tómendedi.
Gıdrometeorologııalyq saraptama jáne Qazgıdromet ortalyǵynyń málimetine qaraǵanda, 2011 jyldyń qarasha aıynda atmosferanyń lastaný deńgeıi 7,8 birlikti quraǵan. Bul 2010 jyldyń osy merzimimen salystyrǵanda 3,9 birlikke tómen.
Mamandardyń pikirinshe, lastanýdyń tómendeýine birqatar keshendi sharalar yqpal etken. Máselen, kásiporyndar men jeke sektordy gazdandyrý, kásiporyndar men avtokólikti qatań baqylaýǵa alý, janarmaı sapasyna jiti kóńil aýdarý jáne t.b sharalar qala aýasynyń jaqsarýyna oń áserin tıgizgen.
Aýanyń lastaný deńgeıin baqylaý 5 statsıonarlyq orynda júrgizilgen. Olar qala aýdandarynyń túrli aımaqtarynda ornalasqan.
