Almatyda qala ákiminiń 1700 balaǵa arnalǵan jańa jyldyq shyrshasy bolyp ótti
ALMATY. 29 jeltoqsan. QazAqparat /Názıra Eleýhan/ - Búgin Almatydaǵy memlekettik tsırkte 1700 oqýshyǵa arnalǵan Almaty qalasy ákiminiń jańa jyldyq merekelik shyrshasy ótti.
Ony qala ákimi Ahmetjan Esimov óziniń quttyqtaý sózimen ashyp, búldirshinderdi kele jatqan Jańa jylmen quttyqtap, ótip bara jatqan jyldyń jalpy elimiz úshin barynsha jemisti bolǵandyǵyn, balalar úshin barlyq jaǵdaılar jasalyp, mektep, balabaqsha, densaýlyq, sport nysandary salynyp jatqandyǵyn erekshe atap ótti. "Igi isterdiń barlyǵy keleshekte jastar jaqsy oqyp, salaýatty ómir saltyn qalyptastyryp, Otanymyzdy súıetin, naǵyz myqty azamat bolyp shyǵý úshin jasalyp otyr", - dedi qala basshysy.
Merekelik sharaǵa qala mektepterindegi úzdik oqýshylar men ata-anasyz qalǵan balalar qatysty. Tsırk aldynda balalardy ertegi keıipkerleri, qazaq batyrlary, Qar hanshaıymy, Santa-Klaýs, qýyrshaqtar, Aıaz Ata men Aqshaqar qarsy alyp, balalarmen oıyn oınady. Sondaı-aq, qoıylym aldynda olar úshin arnaıy dıskoteka uıymdastyryldy. Onda búldirshinder bı bılep, jańajyldyq óleńder aıtyp, mýlt-kontsertti tamashalady. Odan soń balalar tsırk ártisteriniń kontserttik baǵdarlamalaryn tamashalady.
Mereke sońynda ár balaǵa qala ákiminiń atynan syılyqtar tabys etildi.
