Almatyda qaqtyǵys kezinde polıtseılerdiń soqqyǵa jyǵylǵan sáti túsirilgen vıdeo jarııalandy
Almaty qalalyq polıtsııa departamentiniń málimetinshe, vıdeojıyntyq 4-5 qańtar aralyǵyndaǵy beınebaqylaý júıeleriniń derekteri men áleýmettik jelilerdegi materıaldardan daıyndaldy.
Eske sala keteıik, júzdegen agressıvti adamdar tártipsizdikterdi, tonaýdy jáne basqa da zańsyz áreketterdi basý kezinde polıtsııa qyzmetkerlerine, áskerı qyzmetkerlerge birneshe ret shabýyl jasap, soqqyǵa jyqqan.
Jalpy alǵanda, lańkestik áreketterdiń jolyn kesý jáne memlekettik organdardyń ákimshilik ǵımarattary men strategııalyq nysandaryna qarýly shabýyldardy toıtarý kezinde Almaty polıtsııasynyń úsh qyzmetkeri qaza tapty, taǵy 185 tártip saqshysy jaraqat aldy, olardyń ekeýiniń jaǵdaıy aýyr.
Qańtardyń 5-i kúni Almaly aýdandyq polıtsııa basqarmasy janyndaǵy polıtsııa bóliminiń ákimshilik ǵımaratyna jasalǵan shabýylǵa toıtarys berý kezinde eki polıtsııa qyzmetkeri Alen Asylhanov pen Rınat Qambetov jaraqat alyp, oqıǵa ornynda qaza tapty.
Taǵy bir tártip saqshysy Nurbolsyn Almasov strategııalyq mańyzy bar nysandardyń birin qorǵaý kezinde mert boldy.
Áskerı jáne qyzmettik boryshyn óteý kezinde kórsetken batyldyǵy men janqııarlyǵy, sondaı-aq memleket múddesin qorǵaýdaǵy erlikteri úshin bul polıtsııa qyzmetkerleri ІІІ dárejeli «Aıbyn» ordenimen marapattaldy.
