Almatyda kafeler men meıramhanalarǵa jazǵy alańdardy keńeıtýge ruqsat berildi
ALMATY. QazAqparat – Almatyda kafeler men meıramhanalarǵa jazǵy alańdardy keńeıtýge ruqsat berildi, dep habarlaıdy QazAqparat tilshisi.
Eske salaıyq, Almatyda 25 mamyrdan bastap 3100 jazǵy alań men qoǵamdyq tamaqtaný oryndary óz qyzmetin qaıta bastaǵan bolatyn. Olardyń jumystarynyń negizgi sharty kórshi stoldaǵy otyrǵan kelýshilerdiń keminde 2 metr ara qashyqtyǵyn kamtamasyz etý jáne bir stolǵa, bir otbasy múshelerin aıtpaǵanda, 4 adamnan artyq adam otyrǵyzbaý qajet. Qoǵamdyq tamaqtandyrý nysandarynyń jumysyna saǵat 23:00-ge deıin ruqsat berildi.
«Áleýmettik qashyqtyqty saqtaý kerek bolǵandyqtan, atalǵan mekemelerde otyrǵyzý oryndarynyń sany 1,5-2 esege tómendep ketti. Budan basqa, keıbir nysandarda jazǵy alańdar joq. Halyq arasyndaǵy joǵary maýsymdyq suranysty eskere otyryp jáne qyzmet kórsetý salasynyń nysandaryn qoldaý maqsatynda, Almaty qalasynyń ákimdigi jazǵy alańdar sanyn, olardy irgeles jatqan aýmaqtarǵa ornalastyrý esebinen, arttyrý múmkindigin usyný týraly sheshim qabyldady»,– dep habarlaıdy qalalyq ákimdik.
Osylaısha, budan buryn jazǵy alańdary joq nysandarǵa meıramhananyń nemese kafeniń irgeles jatqan aýmaǵyna, kúrdeli qurylys salmaı, ýaqytsha, epıdemıologııalyq jaǵdaı turaqtanǵansha jáne shekteý sharalary alynǵanǵa deıin qosymsha oryndar qoıýǵa ruqsat etiledi. Bul rette, stoldar jaıaý júrginshilerge, velosıpedshilerge, sondaı-aq kólikterdiń júrýine kedergi nemese qolaısyzdyq keltirmeýi tıis.
Almaty qalasynyń menshigindegi jer telimderiniń shekaralarynda maýsymdyq kafelerdi (jazǵy alańdardy) ornalastyrý jer-quqyqtyq qatynastary resimdelmeı júzege asyrylady. Alaıda, atalǵan nysandardy turǵyn úılerdiń terezesiniń aldynan ashýǵa, sol úılerdiń turǵyndarynyń jazbasha kelisimi bolǵan jaǵdaıda ǵana ruqsat etiledi. Nysandardyń qyzmetine barlyq sanıtarııalyq-epıdemıologııalyq talaptar saqtalǵan jaǵdaıda, ruqsat etiledi.
Sonymen birge, qazirgi ýaqytta, qalada banketter men saltanatty jıyndar ótkizýge bolmaıdy. Sondaı-aq, karaoke, bılıard jáne basqa da qoǵamdyq tamaqtandyrý aýmaǵynda jumys isteıtin kóńil kóteretin mekemelerdiń jumysyna tyıym salynǵan. Kalıanǵa da ruqsat joq.
