Almatyda Qadyr Myrza Álini eske alýǵa arnalǵan ádebı-sazdy eske alý keshi ótedi

 Qazaqtyń Abaı atyndaǵy memlekettik opera jáne balet teatrynda bolatyn bul shara  aqynnyń dúnıeden ótkenine 1 jyl tolýyna oraılastyryldy. Ony Mádenıet mınıstrligi men  Almaty qalasy  ákimdiginiń qoldaýymen «Qadyr Myrza Áli» qoǵamdyq qory uıymdastyryp otyr.

1935 jyly 5 qańtarda Batys Qazaqstan oblysynyń Jympıty kentinde ómirge kelgen Qadyr  Ǵınaıatuly  2011 jyly 22 qańtarda 76 jasqa tolǵan shaǵynda dúnıeden ozǵan bolatyn.  Shyǵarmalary eń alǵash ret  1954 jyly «Pıoner» jýrnalynda jarııalanǵan edi.  Qalamgerdiń keńestik dáýirde «Kóktem» (1959), «Danyshpan» (1961), «Sabaq», «Oı ormany» (1965), «Dala dıdary» (1966), «Bulbul baǵy» (1967), «Aq otaý» (1968), «Kúmis qońyraý», (1970), «Dombyra» (1971, 1974), «Kesh» (1973), «Jeruıyq» (1976), «Qoramsaq», «Kókpar», «Qyzyl kitap», «Alaqan» (1981), «Saz sıqyry» (1982), «Kúnder-aı» (1984) tárizdi 40-tan astam jyr jınaqtary men ádebı-syn, án óleńderi men prozalyq kitaptary jaryq kórdi. Sondaı-aq 1990 jyldary tańdamaly shyǵarmalarynyń bes tomdyǵy, al 2001 jyly «Qazyǵurt» baspasynan 15 tomdyǵy shyqty.  Óleńderi birqatar  shet tilderge aýdarylyp, birneshe pesasy sahnada qoıylǵan. San qyrly óner ıesi aýdarmashy retinde ózi de   Ovııdiń, Rýmıdiń, Geıneniń, Gıýgonyń, Lermontovtyń, Esenınniń, Rasýl Ǵamzatovtyń, Mejelaıtıstiń, Petıfı jáne taǵy basqalardyń jyrlaryn qazaq tilinde sóıletti.

Shyǵarmashylyq qyzmettegi eren eńbegi eskerýsiz qalmaı, 1966 jyly «Oı ormany» jınaǵy úshin Qazaqstan Lenın komsomolynyń syılyǵyn,  1980 jyly «Jeruıyq» jyr kitaby úshin Qazaq KSR Memlekettik syılyǵynyń laýreaty atandy.  Sondaı-aq Qazaqstannyń halyq jazýshysy,  Táýelsiz «Tarlan» syılyǵynyń jáne «І dárejeli Dostyq»,  «Parasat» ordenderiniń ıegeri atanyp, Qazaqstan Respýblıkasynyń tuńǵysh ánurany mátini avtorlarynyń biri boldy.