Almatyda qabir basyna barǵan jýrnalısti uryp-soǵyp, tonap ketken
ASTANA. QazAqparat - Almatyda Rysqulov kóshesi boıyndaǵy zıratqa marqum bolǵan týystarynyń basyna gúl qoıa barǵan jýrnalıst Tatıana Gýrjııdi belgisiz er adam tamaǵyna pyshaqpen qorqytyp, tonap ketken. Bul týraly ol Feısbýktegi paraqshasynda habarlady.
Jýrnalıstiń jazýynsha, eýropalyq túr-turpatty 40-50 jastaǵy er adam aqshasyn, uıaly telefonyn, neke júzigin jáne basqa da zattaryn tartyp alǵan. Tamaǵyna pyshaq taqap, qorqytqan. Tonaý kezinde qoly men tamaǵyn jaraqattaǵan.
«Qorshaýdyń janynan er adam ótip ketken. Sálden soń ol qorshaýdyń ishine kirip keldi de tamaǵyma pyshaq taqap turyp: «Aıtqanymnyń bárin isteseń, aman qalsyń», - dedi. ...Odan soń neke júzigimdi sheship aldy. Ámııanymdy shyǵartqyzyp, ishinen bar aqshany sypyryp aldy. Uıaly telefonyń qaıda dep surady. Osy sátte bireý maǵan qońyraý shalmasy bar ma! Men onyń pyshaqpen jaı ǵana qorqytyp turmaǵanyn túsindim. Kenet meni oryndyqqa ıterip qaldy da, sómkemdi aqtara bastady. Men qulap bara jatyp oryndyqqa soǵyldym. Keıin ol qaraqusymdy qorshaýǵa birneshe ret soqty...», - dep jazady zardap shegýshi
Tonaýshy keıin polıtsııaǵa shaǵymdansań, taýyp, pyshaqtap ketemin dep qorqytqan jáne onysy jaı ǵana qoqan-loqy emes bolyp shyqqan.
Tatıana ol ketken soń úıine jetip, polıtsııa shaqyrtqan. Saqshylarmen birge qylmys bolǵan jerge kelgende egde jastaǵy áıeldiń qan-josa bolyp kúzetshiniń janynda otyrǵanyn kórgen. Dál sol qanipezer tonaýshy araǵa az ǵana ýaqyt salyp, ony da tonamaq bolǵan kórinedi. Alaıda ekinshi qurban aıǵaılap, kómek shaqyrýǵa tyrysqan. Tonaýshy da aıamaı, áıeldi pyshaqtap ketken.
Jýrnalıst keltirgen málimet boıynsha, qazirgi sátte kúdikti izdestirilip jatyr.
