Almatyda JasylAlmaty aktsııasy aıasynda 300 myńnan astam aǵash otyrǵyzylady
ALMATY. QazAqparat – Bıyl Almatyda #JasylAlmaty aktsııasy aıasynda 330 myń túp aǵash otyrǵyzylmaq, dep habarlaıdy QazAqparat tilshisi.
Almaty ekologııasyna nemquraı qaramaıtyn ekobelsendiler men qarapaıym qala turǵyndary #JasylAlmaty aýqymdy aktsııasyna qoldaý bildirdi. Bul týraly shahar basshysy Instagram -daǵy paraqshasynda jazdy.
«Merekelik demalys kúni, 8 naýryzda ekobelsendi Tımýr Eleýsizov bastaǵan bastamashyl top AirVision qorynyń qoldaýymen Alataý aýdanynyń aýmaǵy arqyly ótetin magıstraldy gaz qubyrynyń sanıtarlyq-qorǵaý bóligine 58 túp qaraǵaı kóshetterin otyrǵyzdy. Jyl basynan beri munda 200-ge jýyq qylqan japyraqty aǵash egilgen edi. @sosnovy_bor_almaty jobasynyń bul ıgi bastamasy shahardy kógaldandyrýǵa úles qosqysy keletin basqa almatylyqtar úshin úlgi bolarlyq is»,- dep jazdy Baqytjan Saǵyntaev.
Sonymen qatar, ol aǵymdaǵy jyly shamamen 330 myń túp aǵash pen aýmaǵy 122 myń sharshy metr bolatyn gúlzarlar otyrǵyzý josparda ekenin jazdy.
«Ótken jyly #JasylAlmaty aktsııasy aıasynda Mohnatka men Kóktóbe taýlarynyń baýraıyna, «Atakent» aýmaǵyndaǵy saıabaqqa, «Atletıkalyq aýyl», Dástúrli óner teatrynyń skverlerine, qala mektepteriniń aýmaqtaryna, «Saıaly» yqshamaýdanynda 135 myńnan astam kóshet egildi. Sondaı-aq MJÁ aıasynda aýmaǵy 110 sharshy metr bolatyn alańqaıǵa gúlzarlar otyrǵyzyldy. Aǵymdaǵy jyly shamamen 330 myń jasyl jelek pen aýmaǵy 122 myń sharshy metr bolatyn alańǵa gúlzarlar otyrǵyzý josparlanyp otyr. Kóktemgi kóshet otyrǵyzý naýqany osy aıda bastalady»,– deıdi ákim