Almatyda «Jasyl Almaty» jobasy boıynsha mıllıon túp aǵash otyrǵyzylady
ALMATY. QazAqparat- Almatyda 2,2 mıllıon aǵash bar, olardyń 550-in emdeý qajet. Bul týraly qala basshysy Baqytjan Saǵyntaev óziniń Instagram-ǵy paraqshasynda jazdy, dep habarlaıdy QazAqparat tilshisi.
«Qalamyzdy keń kólemde jasyldandyrý boıynsha keńes ótkizdim. Qazir Almatyda 2,2 mıllıon aǵash bar, alaıda olardyń 550-i emdeýdi qajet etedi. Kúzde «Jasyl Almaty» úsh jyldyq jobany bastaýdy usynamyn, onyń barysynda qala boıynsha kem degende mıllıon túp aǵash otyrǵyzylatyn bolady. Eń aldymen Alataý, Naýryzbaı, Jetisý, Almaly aýdandarynda. Biz jańa yqsham aýdandardy, kósheler men aýlalardy jasyldandyryp, búkil megapolıs boıynsha turǵyndar demalatyn aımaqtar, jańa býlvarlar men skverler jasaýǵa tıispiz.
Bul aýqymdy ári paıdaly is. Jasyl ekonomıka basqarmasy bul sharaǵa barlyq ekologııalyq ÚEU men azamattyq belsendilerdi, jeke bıznesti, izgi nıetti qalalyqtardy keńinen tartqany jón. Eger árbir almatylyq bir aǵashtan otyrǵyzsa, onda qala ekologııasynyń ózgeretinine senimdimin. Kelińizder, bárimiz birigip, Almatyǵa jasyl qala dańqyn qaıtaraıyq, sol úshin maqtanatyn bolamyz»,-dep jazdy qala basshysy.
