Almatyda izdeýdegi 42 kólik tabyldy

ALMATY. QazAqparat - Almaty qalalyq ІІD mamandandyrylǵan HQKO bıylǵy 7 aıdaǵy jumysyn qorytyndylady, dep habarlaıdy QazAqparat tilshisi qalalyq ІІD silteme jasap.

Qalalyq ІІD ákimshilik polıtsııa basqarmasynyń bólim basshysy Nurlan Amanbektiń aıtýynsha, ortalyqta memlekettik qyzmet túrlerinen bólek azamattardyń ótinishteri qaralǵan.

«105 kóliktiń nómirlik belgileri ózgeriltilgeni anyqtaldy. Urlanǵan 42 avtokólik tabyldy. Sondaı-aq, 29 derek boıynsha adamdar jalǵan qujatpen jumys jasaǵan. Jyl basynan beri 8 258 shaǵym qaraldy. 15 114 kepilzat kelisimi tirkelip, alyndy», - dedi polıtsııa podpolkovnıgi Nurlan  Amanbek.

Aıta ketý kerek, jyl basynan beri HQKO mamandary 252 701 memlekettik qyzmet kórsetken. Onyń ishinde kólikti tirkeý men esepke alýǵa 220 029 qyzmet kórsetildi. Kún saıyn ortalyqqa 3-5 myń klıent keledi. Osy ýaqyt aralyǵynda 108 507 kólik tirkeldi.

101 152 memlekettik nómir, 12 535 tranzıttik nómir, 32672 júrgizýshi kýáligi berilgen. Sondaı-aq, quny 294 mln 407 myń bolatyn 791 VIP nómir berildi.