Almatyda iz-túzsiz ketken Anna Chakırtova tabyldy
ALMATY. QazAqparat - Almatyda buryn habar-osharsyz ketken «Tomırıs» fılminiń prodıýseri Anna Chakırtova tabyldy. Bul týraly QazAqparat tilshisine áıeldiń uly Alan habarlady.
«Bizge anamnyń tabylǵany týraly habar keldi. Qazir biz soǵan bara jatyrmyz. Onyń jaǵdaıyn bileıik, bári ornyna túsken soń egjeı-tegjeıli aıtamyz. Ázirge eshteńe aıta almaımyz. Tek onyń tiri ekenin aıta alamyn», - deıdi Anna Chakırtovanyń uly Alan.
Eske sala keteıik, Anna Chakırtova 2 shilde kúni 21:20 shamasynda Qabanbaı batyr jáne Qonaev kósheleriniń qıylysyndaǵy úıinen shyǵyp ketip, qaıta oralmaǵan bolatyn. Uıaly telefonyn páterinde qaldyrǵan. Sol kezde ony eshkim, tipti kórshileri de kórmegendigi habarlanǵan bolatyn. Prodıýserdiń eriniń aıtýynsha, buǵan deıin ol eshqashan bulaı habar-osharsyz ketpegen.
