Almatyda iz-túzsiz ketken 20 jastaǵy boıjetkenniń denesi tabyldy
ALMATY. QazAqparat - Almatyda iz-túzsiz joǵalǵan 20 jastaǵy boıjetkenniń denesi tabyldy, dep habarlaıdy QazAqparat.
Almaty qalalyq polıtsııa departamenti taratqan málimetke sensek, 20 naýryz kúni qyzdyń ápkesi polıtsııaǵa júginip, sińlisiniń joǵalyp ketkenin habarlaǵan.
Boıjetkendi izdep tabý úshin arnaıy jedel tergeý toby quryldy.
Іzdeý jumysy kezinde qyzdyń sol kúni áleýmettik jelide tanysqan jigitpen kezdesýdi josparlaǵany anyqtaldy.
Keıin belgili bolǵandaı, boıjetken sol beıtanys jigittiń qylmystyq áreketinen qaza tapqan.
Kúdikti - 1993 jyly týǵan Túrkistan oblysynyń turǵyny.
«Ol qazir ustalǵan, qamaýda otyr. Onyń bul qylmysqa barýyna ne sebep bolǵanyn jáne ony qalaı júzege asyrǵanyn anyqtaý úshin tergeý jumysy bastaldy» dep habarlady Almaty qalalyq polıtsııa departamentiniń krımınaldy polıtsııa basqarmasynyń bastyǵy Erkin Іńkárov.
Atalǵan fakti negizinde Qylmystyq kodekstiń 99-baby 2-bólimi boıynsha is qozǵaldy.
