Almatyda IX Respýblıkalyq balalar ekologııalyq baıqaýynyń jeńimpazdary anyqtaldy
ALMATY. 30 maýsym. QazAqparat /Názıra Eleýhan/ - Búgin Almatydaǵy Qazaqstan Respýblıkasy Tuńǵysh Prezıdentiniń Qorynda «Qazaqstannyń qazirgi beınesi» atty IX Respýblıkalyq balalar ekologııalyq baıqaýynyń jeńimpazdaryn marapattaý rásimi bolyp ótti.
Atalmysh is-shara «Shevron» korporatsııasynyń «Jer - bizdiń ortaq úıimiz» atty ekologııalyq bilim berý baǵdarlamasy aıasynda ótkizildi. Respýblıkalyq baıqaý Qazaqstanda 2002 jyldan beri uıymdastyrylyp keledi. Sharanyń uıymdastyrýshysy - Qazaq Ulttyq ıÝNESKO Klýbtarynyń Federatsııasy.
Jobanyń maqsaty - balalardy ekologııa máselesine qatystyrý, jalpy jas óskindi ekologııalyq mádenıetke, otansúıgishtikke, qorshaǵan ortany, elimizidiń tabıǵı, mádenı baılyqtaryn, jerimizdiń ekojúıesin qorǵaý úshin azamattyq jaýapkershilikke tárbıeleýge kómektesý bolyp tabylady.
Baıqaýǵa Á.Qasteev atyndaǵy beıneleý óneri jáne tehnıkalyq kórkemdeý mektebi, sonymen qatar, 12 jastan 14 jasqa deıingi elimizden ár jerindegi arnaıy kórkemóner mektepterinde oqıtyn talantty balalar qatysty. Baıqaý Qazaqstannyń 14 oblysyn, sondaı-aq Astana men Almaty qalalaryn qamtydy.
Aımaqtyq baıqaýlar qorytyndysy boıynsha túrli taqyryptarda tabıǵat aıasynda ótken sabaqtarǵa (plener), sheberlik-klastarǵa jáne otandyq beıneleý óneriniń tanymal tulǵalarynyń dáristerine qatysqan 50 jeńimpazdyń jumysy tańdap alyndy.
Baıqaý nátıjesi boıynsha, Bas júldege pavlodarlyq jas sýretshi Dalııa Asqarovanyń jumysy laıyq dep tanyldy. І júldeni almatylyq Ibragımova Aıala jeńip aldy. ІІ-oryn Óskemen qalasynyń jas sýretshisi Elızaveta Lýbıagınaǵa buıyrdy. ІІІ-shi oryndy qaraǵandylyq jas talant ıesi Ýna Islamova jeńip aldy. Bunymen qatar, «Qazaqstannyń sáýlettik eskertkishteri», «Qala peızajy», «Fýtýrıstik joba» atalymdarynyń jeńimpazdary marapattaldy. Sharaǵa qatysqan 50 jas sýretshi syılyqsyz qalmady. Barlyǵy demeýshilerdiń arnaıy syılyqtarymen marapattaldy.
"Kásibı sýretshi retinde búgin el ómirinde mańyzdy oqıǵa bolyp jatyr dep sanaımyn. Ekologııa - búgingi zamandaǵy álemniń eń ózekti máselesi bolyp tabylady. Balalar ekologııa quqyǵynyń bir bóligi ekenin, jerdi, tabıǵatty qorǵaý qajet ekendigin, ekologııaǵa qatysty máselelermen aınalysý kerek ekendikterin bilýleri kerek",-deıdi ádil-qazylar alqasynyń tóraǵasy, tanymal sýretshi Amandos Aqanaev.
Onyń aıtýynsha, 50 jumystyń barlyǵy ózinshe erekshe jáne qyzyqty. "Eń úzdik jumysty tańdaý óte qıyn boldy. Barlyq jumys joǵary baǵaǵa laıyq. Jas sýretshilerdiń bári shetinen sheber, báriniń fantazııalary keremet, olardyń oılaýy da, kózqarastary da basqasha",-dep atap ótti ol.
Atalmysh is-shara QR qorshaǵan ortany qorǵaý mınıstrliginiń, QR mádenıet jáne aqparat mınıstrliginiń, QR bilim jáne ǵylym mınıstrliginiń, Almaty qalasy ákimdiginiń, QR kórkemóner Akademııasynyń, Qazaqstan Respýblıkasy Tuńǵysh Prezıdenti Qorynyń, Happylon otbasylyq-oıyn-saýyq ortalyǵynyń, "Suńqar" suńqar ortalyǵynyń, "Kók-Tóbe" taý saıabaǵynyń, Qazaqstan Respýblıkasynyń Ulttyq murajaıynyń, "Arıal" golf klýbynyń, "Friendly Energy" kompanııasynyń qoldaýymen ótkizildi.
