Almatyda ıtpen serýendeýge tyıym salynatyn oryndar belgilendi
Almaty. QazAqparat - Almaty qalasynda ıt pen mysyqty ustaý jáne kútýdiń jańa erejeleri bekitildi, - dep habarlaıdy QazAqparat tilshisi Almaty qalasy Aýyl sharýashylyǵy jáne veterınarııa basqarmasyna silteme jasaı otyryp.
Jańartylǵan ereje Almaty qalasy Máslıhatynyń VI shaqyrylymynyń XXVII sessııasynda bekitildi. Erejege saı, úı janýarymen qoǵamdyq ortada serýendeý kezinde ıt moıyn jippen júrýi jáne ıesiniń jiti baqylaýynda bolýy tıis. Qajet bolǵanda, qaýipsizdik sharalarynyń oryndalýy mindetteledi.
Bul rette, balalardyń oıyn alańdary men sporttyq alańdarda, mektepke deıingi jáne mektep ǵımarattarynyń, emdeý mekemeleriniń aýmaǵynda, arnaıy belgiler ornatylǵan jerlerde ıtpen serýendeýge tyıym salynady.
Erejege oraı, joǵalǵan janýarlardy tabýdyń jolyn jeńildetý jáne olardyń aımaqtyq statıstıkasyn jınaqtaý maqsatynda Almaty qalasyndaǵy ıtter men mysyqtardy biryńǵaı derekqorǵa tirkeý mindetteledi.
Bılik ókilderi ıt pen mysyqtyń baqylaýsyz kóbeıýine jol bermeýge jáne qaraýsyz qaldyrmaýǵa shaqyrady.
«Janýardy asyraý múmkindigi endigári bolmaıtyn jaǵdaıda onyń ıesi ony basqa bireýge nemese arnaıy mamandandyrylǵan ortalyqtarǵa ótkizýi tıis. Odan bólek, qala aýmaǵynda ıt tóbelesin uıymdastyrýǵa da shekteý qoıylady, - dep jazylǵan resmı qujatta.
Sonymen qatar, erejege ıtter men mysyqtardy tasymaldaý, shetelge shyǵarý jáne alyp kelý, kórmeler men is-sharalarǵa qatystyrý standarty, sonymen qatar, janýarlardyń veterınarlyq-sanıtarlyq jaǵdaıyn baqylaý men olardyń qalada aýrýlardyń taralýyna sebepshi bolýyna jol bermeý syndy nusqaýlyqtar bekitildi. Mysaly, úı janýaryn jasy úsh aıǵa tolǵan ýaqyttan bastap, vaktsınalaý mindeteledi. Odan bólek, janýar ıesi kem degende jylyna úsh ret ıt ne mysyq terisin tekserýden ótkizip, ony toǵyshar parazıtterden tazalap otyrýy tıis.
Eger janýar úı jaǵdaıynda erejege saı ustalmasa, kórshilerdiń tynyshtyǵyn buzyp, jaǵymsyz ıis taratsa, sot sheshimi boıynsha ıesin úı janýaryn baǵý quqyǵynan shekteý jáne aıyrý sharalary qarastyrylady.
Turǵyn úı keshenderinde janýarlardy asyraý, ıt nemese mysyqqa arnalǵan qonaqúı jáne arnaıy baǵý ortalyqtaryn ashýǵa tyıym salynady. Ereje barlyq ıt jáne mysyq ıelerine, olardyń jeke nemese zańdy tulǵa ekenine qaramastan, birdeı júredi. Ereje buzýshylar QR zańnamasyna sáıkes jaýapqa tartylady.
Aıta ketsek, Almaty qalasyndaǵy úı janýarlaryn ustaý jáne kútýdiń jańa erejeleri 2017-2020 jyldarǵa baǵyttalǵan úı janýarlarynyń jaǵdaıyn jaqsartý jol kartasyna oraı bekitildi. QR veterınar dárigerler assotsıatsııasy, «Animal Law Kazakhstan» komıteti, kınologtar men ózge de qoǵamdyq uıymdar Almaty qalasy aýyl sharýashylyǵy men veterınarııa basqarmasymen birige otyryp, resmı qujatty daıyndaýǵa atsalysty.
