Almatyda Italııa eliniń kardıohırýrgy sheberlik dáris ótkizdi
ALMATY. Sáýirdiń 15-i. QazAqparat /Názıra Eleýhan/- Búgin Almatyda qalalyq kardıologııalyq ortalyqta «Dı Padova Medıtsına Ordeniniń» jáne nemis dárigerlik qoǵamynyń múshesi, Italııa eliniń Mırano kardıologııalyq emhana bóliminiń dırektory, professor, kardıohırýrg Bernhard Reımers ınterventsııalyq kordıologııa boıynsha sheberlik dáris ótkizdi,
dep habarlaıdy QazAqparat.
Onyń aıtýynsha, ınterventsııalyq kordıologııa - júrek, kordıologııalyq aýrýlardy emdeýdiń jáne aldyn alýdyń eń zamanaýı ádisteriniń biri. «Mundaı ádis ashyq túrde jasalynatyn operatsııa, ne bolmasa dástúrli dári-dármekpen emdeýge qaraǵanda tıimdi, ıaǵnı ondaı ádis emdelýshiniń ómirine qaýip tóndirmeıdi, operatsııadan keıin patsıent tez saýyǵyp ketedi, eń mańyzdysy naýqas bul aýrýdan qulan taza jazylyp shyǵady. Men jylyna 1000 adamǵa operatsııa jasaımyn. Álemniń kóptegen elderinde, Germanııada, Qytaıda, Birikken Arab Ámirliginde, Máskeýde, Amerıkada jáne taǵy da basqa elderde ınterventsııalyq kordıologııa boıynsha operatsııalar jasap, sheberlik dárister ótkizdim», dedi Italııadan kelegen kardıohırýrg Bernhard Reımers.
Qalalyq kardıologııalyq ortalyqtyń Bas dárigeri Nurlan Turdalınniń aıtýynsha, mundaı dárister kardıolog mamandar úshin úırenýge jáne tájirıbe jınaqtaýǵa múmkindik beredi. «Bizdiń ortalyqqa ótken jyly ıshemııalyq júrek aýrýymen 1200 naýqas, ınfarkpen úsh jarym myń adam kelip tústi. Onyń 400-ne ınterventsııalyq operatsııa jasaldy», dedi Nurlan Turdalın. Onyń aıtýynsha, búgingi kúni elimizde ınterventsııalyq hırýrg mamandary tapshy. «Ondaı kordıolog bolý úshin oqýdy bitirgen jas mamanǵa az degende 5 jyl ýaqyt qajet», dep atap ótti Nurlan Turdalın.
Sheberlik dáriske elimizdiń barlyq kardıohırýrgııa klınıkalarynan kelgen dárigerler jáne qalalyq kardıologııalyq ortalyqtyń qyzmetkerleri qatysty.
Shymkent qalasynan kelgen ınterventsııalyq kordıolog Tóregeldi Júnisovtyń aıtýynsha, osyndaı operatsııalar jańa zamanǵy apparatpen Shymkent qalasynda da jasalady. «Ótken jyly bizde 1000 koronorografııalyq operatsııa jasaldy», dedi ol.
