Almatyda ıt pen mysyqtar serýendeıtin oryndar paıda bolady
ALMATY. QazAqparat - Almatyda qańǵybas janýarlardyń sanyn retteýdiń 2017-2020 jyldarǵa arnalǵan jańa jobasy usynyldy, dep habarlaıdy QazAqparat tilshisi.
«Jol kartasy» gýmanızm qaǵıdattaryna saı jasalǵan.
Búgin qalalyq Aýyl sharýashylyǵy basqarmasynyń ókilderi jańa jobany qala ákiminiń orynbasary Erlan Áýkenovke tanystyrdy.
«Bizdiń janýarlarymyzǵa degen qatynas búkil álemdegideı bolsyn desek, onda ozyq álemdik tájirıbeni engizýimiz kerek. Ol úshin jaqsartý jumystaryn únemi júrgizip turýymyz shart. Osy jerde jınalǵan mamandar men qoǵamdyq uıymdardyń ókilderiniń pikirlerin eskere otyryp, qańǵybas janýarlardyń sanyn retteýdiń jańa jobasyn qabyldaýymyz kerek», - dedi qala ákiminiń orynbasary Erlan Áýkenov.
Aıta ketý kerek, bul joba aýyl sharýashylyǵy janyndaǵy «Veterınarııa ortalyǵy» kásipornynyń jumysyn damytyp, materıaldyq bazasyn jaqsartýǵa arnalǵan. 
«Jol kartasynda» tómendegi bes baǵytta jumys jasaý kózdelgen.
Eń aldymen, janýarlardy aýlaý men olardy qamaýda ustaý adamgershilik qaǵıdattaryna saı ótýi kerek. Janýarlardy baǵý, tamaqtandyrý olardyń salmaǵy men boıyna sáıkes júrýi tıis.
Sondaı-aq, kásiporynnyń materıaldyq-tehnıkalyq bazasyn jaqsartý kózdelgen.
Úı janýarlaryn ustaıtyn azamattardyń mádenıetin arttyrý úshin olarmen áńgime júrgizilmek.
Jańa jobaǵa sáıkes, ár aýdanda ıt pen mysyqty serýenge shyǵaratyn arnaıy oryndar jasaqtalyp, janýarlardyń nájisterin jınaýǵa arnaıy paket taratatyn qurylǵylar ornatylady.
Sonymen qatar, bıyl úısiz janýarlarǵa arnalǵan baspananyń jobalyq-smetalyq qujattamasy ázirlenedi.
