Almatyda ІT kvartal ashyldy
ALMATY. QazAqparat - Almaty ortalyǵynda aqparattyq tehnologııalardy damytýǵa arnalǵan IT Kvartal ashyldy, dep habarlaıdy QazAqparat tilshisi.
Aýdany 17 000 sharshy metr bolatyn alań «Aqparattyq tehnologııalar parki» bazasynda ornalasqan.
Jyldyń sońyna deıin 10 ІT kompanııa men 15 startap joba ortalyqtyń rezıdenti bolyp úlgeredi.
2018 jyly bul jobalardyń sanyn eki esege jetkizý josparda bar.
«ІT kvartal qalada atalǵan baǵyttaǵy kompanııalardyń bir jerge shoǵyrlanýyna múmkindik jasaıdy. Bul alań jasampazdarǵa, ınnovator adamdarǵa arnalǵan. Kezeń kezeńimen ındýstrııa 4.0, mashına jasaý men jańa materıaldar baǵyttary boıynsha ýákiletti ortalyqtar ashatyn bolamyz. Sonymen qatar arnaıy ekonomıkalyq aımaq bazasynda geologııalyq klaster salý oıda bar. Buǵan iri ken óndirisi magnattarynan ınvestıtsııa tartý kózdelgen», - dedi Almaty Tech Garden dırektory Sanjar Kettebekov.
Alańda ornalasqan startaptar IBM, ARM, Autodesk, 1S taǵy basqa arnaıy alańdardyń aqparattyq tehnologııalaryn paıdalanatyn bolady.
Sonymen qatar, aqparattyq tehnologııalar bazasynda ornalasqandyqtan startaptar jer, múlik, áleýmettik salyqtardan bosatylady.
Ortalyqty Almaty Tech Garden avtonomdy klasteri Qazaqstan Úkimetiniń aqparattyq kommýnıkatsııalyq tehnologııa salasyn damytý men Qazaqstannyń tsıfrli transformatsııasy aıasynda ashty.
Biraq jobalardy qarjylandyrýǵa jeke ınvestorlar tartylǵan.
