Almatyda IT kompanııalardyń 60 paıyzy ornalasqan
Qazaqstan Prezıdenti Qasym-Jomart Toqaev ekonomıkanyń básekege qabilettiligin qamtamasyz etýdiń basym baǵyty retinde ІT ındýstrııaǵa qolaıly jaǵdaı jasaýdy jáne adamı kapıtaldy damytýdy tsıfrlyq transformatsııalaýdy belgilegen bolatyn.
Úkimet basshysy Álıhan Smaıylov osy jyldyń aqpan aıynda Almatyda ótken Digital Almaty forýmynda Almaty – iskerlik qana emes, sonymen qatar Qazaqstannyń tsıfrlyq astanasy, munda IT kompanııalardyń 60 paıyzy ornalasqanyn aıtqan bolatyn.
«Qazaqstan memlekettik basqarýdy tsıfrlyq transformatsııalaý jolymen júrip keledi. Tsıfrlandyrý – eldiń barlyq azamaty úshin teń múmkindikter men ádilettilikti qamtamasyz etýdiń mańyzdy quramdas bóligi. Budan shyǵatyn qorytyndy – memlekettik saıasattyń basty nazarynda adam, onyń qajettilikteri men múddesi turady. Mysaly, biz BUU ádistemesi boıynsha otbasy ál-aýqatynyń 80 parametrin jınadyq. Bul kún saıyn qıyn ómirlik jaǵdaıǵa tap bolǵan otbasylardy anyqtaýǵa kómektesedi. Mundaǵy negizgi tásilderdiń biri – memlekettik qyzmetti kórsetýdiń kóp platformalyq qaǵıdatyn júzege asyrý. Memleket bızneske memlekettik qyzmetterdi óz platformasy men tsıfrlyq ekojúıesine biriktirý múmkindigin berip, tyǵyryqqa tirelgen modelden bas tartyp otyr», - dep atap ótti Premer-Mınıstr.
Almaty – elimizdiń IT ındýstrııanyń astanasy. Elimizdegi IT kompanııalardyń basym bóligi osynda ornalasqan. Mundaı pikirdi Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtqan edi. «Almatyda aqparattyq tehnologııalar salasynyń damýyna qolaıly ınfraqurylym qalyptasqan. Sondyqtan biz qalanyń áleýetin úzdik IT mamandardy jınaıtyn óńirlik hab qurýǵa múddelimiz.
«Álemde tsıfrlyq sala – kózdi ashyp-jumǵansha ózgerý ústinde», - dedi Baǵdat Mýsın.
Almaty Qazaqstannyń eń iri megapolısi retinde tsıfrlyq transformatsııalar farvaterinde senimdi túrde alǵa jyljyp jatyr.
Almatyda tsıfrlandyrý deńgeıi Qazaqstandaǵy eń joǵary kórsetkishterdiń biri: búginde megapolıste memlekettik qyzmetterdiń 96%-y tsıfrlyq formatta júrgiziledi jáne bul kórsetkish únemi ósip keledi.
Almaty alǵash ret Thoughtlab (Nıý-Iork) álemdik jetekshi zertteý kompanııasynyń nusqasy boıynsha tsıfrlyq damý strategııalarynyń ázirligi dárejesi jóninde Azııa qalalarynyń alǵashqy bestigine kirdi.
Budan bólek, Almaty qalasy «Almaty derekter kóli – Biryńǵaı derekterdi saqtaý» jobasymen IEEE Smart Cities Awards halyqaralyq «aqyldy qalalar» baıqaýynyń fınalısi boldy. Osy jyldyń kúzinde Almaty qalasynyń «tsıfrlyq egizin» qurý josparda.
Erbolat Dosaevtyń aıtýynsha, Almatynyń tsıfrlyq egizine kólik, ekonomıkalyq, ekologııalyq jáne qurylys derekteri engiziletin bolady. Sondaı-aq úlken derekterdi taldaý negizinde qalany damytý stsenarııiniń fýnktsıonaly bar platformany engizý josparlanyp otyr.
«Qabyldanǵan qalany damytý baǵdarlamasyndaǵy 7 negizgi basymdyqtyń biri – «Almaty – Smart-sıtı» qurý. Osy jyldyń kúzine qaraı Sıngapýr jáne Shanhaı sııaqty megapolısterge uqsas qalanyń «tsıfrlyq egizin» qurýdy bastaý josparda bar.
Bul – qalanyń Biryńǵaı derekter qoımasy, Biryńǵaı geoanalıtıkalyq platforma. Biryńǵaı beınebaqylaý júıesi. Bul eń aldymen, jaıly qalalyq ortany qurý jáne qala turǵyndary men qonaqtarynyń qaýipsizdigin qamtamasyz etý», - degen bolatyn E.Dosaev.