Almatyda Islam álemindegi uly ǵalymdardyń asa sırek kezdesetin eńbekteriniń kórmesi ashyldy (FOTO)
ALMATY. QazAqparat- Búgin Almatyda QR Ulttyq kitaphanasynyń kórmeler zalynda «Almaty - Islam mádenıetiniń astanasy - 2015» memlekettik baǵdarlamasy aıasynda Islam álemindegi uly ǵalymdar eńbekteriniń kitap kórmesi ashyldy.
«2009 jyly Bakýde Islam yntymaqtastyǵy uıymyna múshe elderdiń mádenıet mınıstrleriniń tórtinshi ıslam konferentsııasynda Almaty qalasy - Azııa aımaǵy boıynsha Islam mádenıetiniń 2015 jylǵy astanasy bolyp jarııalandy. Qalamyz tekten-tekke bekitilgen joq. Almaty - Qazaqstannyń mádenı astanasy, ǵylym men bilimniń altyn besigi. Qalamyzda 300-den asa mádenı ortalyq, 115 tarıhı qundylyqqa ıe eskertkish bar. Almaty qalasynyń Islam mádenıetiniń astanasy bolyp jarııalanýy - Islam kókjıeginiń odan ári keńeıýine, qalamyzdyń álemdik deńgeıdegi mádenıet ortalyqtarynyń birine aınalýyna úlken úles qosady», - dedi óz sózinde QR Ulttyq kitaphanasy Sırek kitaptar men qoljazbalar qorynyń basshysy Aıhan Bekbolatova.
Kórmede QR Ulttyq kitaphanasy qorynan XII-XVIII ǵǵ. kóne qoljazba Qurandar, Súleımen Baqyrǵanıdiń «Hıkmetteri» (XVIǵ.), shyǵys aqyndary Nızamı, Navoı, Saǵdı, Hafız, Jámı, Fızýlı jáne taǵy basqa da aqyndardyń ıslam dini boıynsha poetıkalyq janrda shaǵataı, arab jáne parsy tilderinde jazǵan qoljazbalary kórermen nazaryna usynyldy.
Kórmeniń tarıhı-mádenı jáne tanymdyq mańyzy óte zor. Ol kelýshilerge burynyraq ǵalymdardyń tek shaǵyn tobyna ǵana qoljetimdi bolyp kelgen jazba muralardyń baǵa jetpes rarıtetterimen tanysýǵa múmkindik beredi.
Іs-sharaǵa «Nur-Otan» partııasy Almaty qalalyq fılıaly janyndaǵy «Mıras» qoǵamdyq keńesiniń ókilderi, Almaty qalasy meshitteriniń bas ımamdary men dintanýshy-ǵalymdar, jýrnalıster, joǵary oqý oryndarynyń stýdentteri jáne Almaty qalasynyń kitaphanashylar qaýymy shaqyrylady.
